ETXEBERRITXO ZENDU DA

Gutxitan ikusi dut musikari bat taula gainean horrenbeste disfrutatzen Etxeberritxok azken boladan Esne Beltzarekin egiten zuen moduan. Ibilbide luzeko panderojolea izan arren nik neuk ez nuen ezagutzen Esne Zopaken diskoa argitaratu zen arte, orduan izan baitzen bere izena belaunaldi gazteen artean zabaltzen hasi zenean. Ez bakarrik kantuaren letra dela eta, baizik eta eszenatokiz eszenatoki Xabi Solanoren hitzetan; trikitilari zaharren omenezko kantua jotzean aipatzen zuen lehendabiziko izena Inazio Bastida "Etxeberritxo"rena izaten zelako. Presente zegoen emanaldietan ordea, izendatu bezain pronto agudo irtetzen zen esku batez publikoa agurtzen eta bestean panderoa zuela.

Pertsonalki ezagutu ez arren edozeinek atzeman zezakeen zenbat gozatzen zuen panderoa esku artean zuenean; saltoka, imintzioka eta irribarrez zebilen beti. Gogoan dut esaterako Bilboko azken Aste Nagusiko Esne Beltzaren kontzertua eta Azpeitiko panderojolearen parte hartzea; 8500 pertsona, zahar eta gazte, bere bizipozaz kutsatzen. Beste dimentsioko panderojolea zen eta horren seinale gaur sare sozialetan albisteak izan duen harrera. Faltan botako dugu seguru, baina ez da makala izan bere ekarpena.

Gazte joan da 1943an Azpeitiko "Etxeberritxo" baserrian jaiotako semea, baina bere izena haundien artean egongo da aurrerantzean. Ondo ezagutzen zuen pertsona baten hitzak irakurriz gero konturatuko gara zein mailakoa zen:

"Gaur, nik ezagutu dudan trikitilari hitza goitik beraño betetzen duen pertsona bakar eta haundi bat joan zaigu. Betirako nire bihotzean!!" Xabi Solano

Doluminak familia eta lagunei, Esne Beltzako beste familiari eta trikitizaleei.