diskoa

ESNEa GAZTA bihurtu zenekoa

Gazta Zati Bat proiektuak azken hilabeteetan izan duen arrakastaren errudunetako batzuk soinu bandaz arduratu ziren Xabi Solano eta DZ dira. Dokumentalerako sortutako konposizio lan horren ondoren zuzenekoa heldu da berriki, bira labur bat eginez Euskal Herritik zehar. Hastapeneko bikotea Aitor Zabaleta Esne Beltzako bajista eta Keu Agirretxea gitarristaren maisutasunaz hornitu da, entzuleak eskertuko duen formazioa eraikiz. Diskoko kantez gain, Keuren kanta batzuk eta Esne Beltzaren beste batzuk jotzen dituzte, baita abesti berriren bat ere. Horien artean bada bat, Etzakit zenaren eta Esne Beltza denaren onena uztartzen dituena eta seguru disko berrian sartuz gero arrakastatsua izango dena. Aurreratuko nuke Gogoak lortu zuen hedapenera heltzeko gai dela pieza hori, trikitixa melodia goxoa erreztasunez barneratzen delako eta letrak behar duen sakontasuna ematen diolako.

Musikaz gain arteak ere badu bere esparrua ikuskizunean. Izan ere Udane Juaristi artistak zuzenean zerotik mural bat osatzen du, argazkia eta margolana uztartuz. Prozesua eta emaitza benetan harrigarriak dira, nik behintzat 90 minututan ikusi dudan arte sorkuntza berritzaile eta ederrena. Proiekzioak ere jartzen dituzte emandaldian zehar, jakin badakigulako ikuslea harrapatzeko baliagarriak direla.

"Esnea gazta bihurtu zenekoa", horrela definituko nuke bertan ikusi eta entzundakoa. Azken hilabeteetan Esne Beltzaren muinak lortu duen heldutasun eta sorkuntza mailaren adierazle; musika, irudia, poesia,...  ikuskari garaikidea, kalitatezkoa eta oparoa.

Saioekin amaitu baino lehen obra ikusteko aukera baduzue, ez zarete damutuko lantalde honen proposamenaz.

Bertan kontzertuko argazki batzuk, esandakoa hobeto ulertzeko: GAZTA ZATI BAT Gernika



Share this post

Beste albisteak

Hurrengo albistea
Mezu berriagoa
Aurreko albistea
Mezu zaharragoa

Kontaktua

Izena

Helbide elektronikoa *

Mezua *