INFERNUKO HAUSPOA

Trikiti dokumentalak

2012-02-11T18:10:00.000+01:00

EITBk 90eko hamarkadan dokumental ezberdinak ekoitzi zituen soinu txikiaren inguruan. Izan ere trikitixaren "boom" ezaguna orduan eman zen eta interes handia sortu zen honen inguruan. Horren adierazle hamarkada bertan ospatu ziren EITB Trikiti Sariak esaterako, arrakasta itzela izaten zutenak jarraitzaileei dagokionez.

Bertan dituzue sasoi haretako dokumentaletako batzuk, Rufino edo Auntxa bezalakoak hizketan eta jotzen ikusteak ez daukalako preziorik ezagutzeko aukerarik ez genituentzako:

Accordion Samurai

2012-02-02T00:07:00.001+01:00

Orain dela pare bat hamarkada Trans Europe Diatonique egitasmoa CD baten islatu zen, Kepa Junkera, Riccardo Tesi eta John Kirkpatrick akordeoilarien eskutik. Accordion Samurai proiektu berri honek badu zerikusia aurreko horrekin, Tesiren parte-hartzeaz gain esentzian antzekoa delako. Disko biak entzuten dituenak horretaz konturatuko da berehala, besteak beste Trioolé kanta komunean dutelako.

Bost soinujole biltzen dira taula gainean eta 10 bat pieza eskaintzen dituzte ahotsetara, beste musika tresnen laguntzarik gabe. Musikari bakoitzak ibilbide luzea du bere estiloan eta uztarketa horrek ematen dio esanahia proiektuari. Japoniar mundu imaginarioak biltzen ditu akordeoilariok, emanaldi oso melodikoak sortuz.

Bertan duzue bideo bat eta baita egitasmoaren webgune eta Spotify-n entzuteko estekak ere bai:

http://thesamurai.jimdo.com

Accordion Samurai - SPOTIFY

Sanin, panderoak berrizten

2012-02-01T22:08:00.001+01:00

Geroz eta pandero bitxiagoak ikusten dira gure artean, baina aspaldian ikusi ditudan berezienak Sanin tailerrekoak dira. Konpostelan kokatzen den artisau talde honek panderoak ez ezik, fundak, paluak, konplementuak, etab. ere egiten ditu. Egurra ondo lantzen dutela argi dago, baina zuran egindako dekorazioaz gain, kolore eta formekin ere asko jolasten dute.

Bertan dituzue eredu batzuk, baina haien webgunean egiten duten guztia ikusi eta nahi izan ezkero erosi ahalko duzue. Originaltasuna ordaindu behar izaten den arren, lan interesgarriak dituzte benetan.

www.sanin.es

Sanin (Facebook)

Oinarri musikalak

2012-02-01T00:50:00.001+01:00

Trikitilari gehienek erromerietarako sena dute eta askok bete egiten dute beharrizan hori, beste batzuk ordea taula azpitik gozatzen dute emanaldiaz. Oraingoan erromeria etxean muntatu ahalko dugu. Izan ere, Euskal Herriko Trikitixa Elkarteak oinarri musikal batzuk igo ditu Soinuaren Hotsa webgunera horren gainean jo ahal izateko.

Momentuz sei baino ez daude, baina gehiago gehituko dituztela espero dugu, benetan baliagarriak direlako. Demostratuta baitago zein onuragarria izan daitekeen ikasketa prozesuan grabaketa baten gainean jotzea, are gehiago hauek bezala kalitatezkoak badira. Nola ez Sib tonuan daude, edonork erabili ditzan. Bertan dituzue:

http://www.trikimailua.com/sailak/oinarriak.htm

Ez daukazue aitzakiarik, egun batez baino ez bada, erromeri-soinujole sentitzeko.

Oskar Estanga, Trikizio taldearekin 2011ko Kilometrotan (Argazkia: Gaizka Peñafiel)

Gozategi, 20 urteko ibilbidea islatuz

2012-01-19T00:03:00.000+01:00

Gogoan dut Gozategi taldearen eztanda, Nor-Nori-Nork kanta non nahi entzuten zen sasoi hura. Ni trikitixaz amesten nuen gaztetxo bat baino ez nintzen, baina orduztik 17 bat urte igaro dira. Izan ere, lehendabiziko disko hura epidemikoa izan zen, zabalkunde azkar eta energikoa izan zuelako. Gero helduko ziren beste hiruzpalau disko gehiago, hauek ere arrakastarekin. Eskainitako ehundaka emanaldiak ahaztu gabe.

20 urteko ibilbide hori laburbiltzeko, disko berria kaleratuko dute datorren hilean aurreko lanetako 12-14 bat kanta gaurkotuz, moldaketa berriekin gainera. Ekoizpenaz Mikel Irazoki arduratu da eta ilusioz beteta daudela baieztatzen dute taldekideek.

Laster entzun ahalko dugu beraz lan berri hau, Asier Gozategiren trikitixa ardatz izango duena seguru.

Partiturak bi ahotsetara, Tapiaren eskutik

2012-01-18T22:50:00.001+01:00

Joseba Tapiak hainbat kantuen moldaketak egin ditu bi ahotsetara jo ditzagun, besteak beste Albiztur edo Ikusi Mendizaleak bezalako pieza famatuenak. Partiturak pdf formatuan deskargatu ditzakegu eta midi artxiboa ere badago, lagungarria izango dena dudarik ez.

Artxibook Soinuaren Hotsa webgunean daude eta honako helbidean "moldaketak bi ahotsetara" atala bilatu baino ez duzue behar:

SOINUAREN HOTSA - Doinutegia

Joseba Tapia, 2011ko udan Mission Folk Music festibalean

Jose Mari Soraluze "Epelde" zendu da

2012-01-17T12:52:00.000+01:00

Larunbatean 97 urte zituela hil zen Epelde trikitilari azkoitiarra. Martirieta bailaran jaio zen 1914ean, Muno baserrian zehazki. Ezizen horrekin ezagutu zuten hastapenetan Epelde baserrian ezkondu zen arte. Orduztik Epelde moduan ezagutua izan da.

2004ko argazkia (Argazki Press)

Aita dultzaineroa zuen baina Jose Marik soinu txikia aukeratu zuen eta frankismoaren garairik latzenetan ere, debekuei aurre egin eta trikitixa jotzen aritu zen plazarik plaza. Hala ere baserriko lanak ez zion utzi kanpora maiz irtetzen.

Ezagutu zutenek gizon ona zela baieztatzen dute, soinulari fina eta atsegina.

Hileta elizkizunera hainbat trikitilari hurbildu ziren azken agurra emateko eta ondoren ere hauspoa astintzen aritu ziren azkoitiarraren omenez. Trikitilari maitatua Epelde, dudarik ez.

Iturria: Azkoitiko Hitza

Kepa Junkerak disko berria EOSrekin batera

2012-01-13T00:42:00.000+01:00

Udaberrian Euskadiko hiribuetan emanaldiak eskainiko ditu Kepa Junkerak Euskadiko Orkestra Sinfonikoarekin batera. Orain dela bi urte lehendabiziko saiakera egin zuten Kursaal aretoan eta oraingoan zuzenekoez gain, diskoa ere kaleratuko dute. Kontzertuen data eta lekuak bertan kontsulta ditzakezue: www.kepajunkera.com

Udan grabatu zuten gehiena Donostian eta orain nahasketa prozesuan ari dira Balea Musika Ideiak estudioan dena prest izateko hurrengo asteetan. Errepertorioari dagokionez, Keparen pieza ezagunak aukeratu eta moldatu diztuzte kasurako eta sasoi baten telebistan eman zuten kontzertu hura baino kalitate gehiagoko interpretazioa izango da honakoa. Enrique Ugarte arduratu da zuzendaritzaz eta nik uste otsailaren erdialderako prest egongo dela CDa.

Informazio gehiago heltzen den bitartean, bertan duzue egitasmo berri honen hastapeneko momentu bat:

LAGUNARTEAN, Gaizka Peñafiel

2011-12-16T01:09:00.004+01:00

Aurreko sarrera pare baten komentatu bezala diskoa preparatzen aritu naiz udaratik eta kalean da jada digipack formatuan. Lanaren izenburua "Lagunartean" da, hala egin genuelako eta Baga-Biga diskoetxearekin argitaratu da. Bertan pop-folk-triki bezala definituko ahal ditugun 10 kanta topa ditzakezue eta horretaz gain badira testu eta argazkiak ere.

Diskoan infernuko hauspoak gutxitan bezain beste ordezkari ditu. Alde batetik Xabi Solano, Esne Beltzako gidaria, zeinek kanta baten trikia jo eta kantatu duen. Bestetik, Kepa Junkera, soinu txikia jo duena beste pieza baten eta egunen baten aurreko hauek bezain ona izango den Asier Olazar, neure lehengusu eta ikasleak ere jo du beste kanta baten. Azkenik nik neuk ere 6 kantetan hauspoa astindu dut. Hori gutxi ez balitz, ekoizle musikariak ere badu ibilbide luzea trikitixaren munduan, Asier Ercilla da bera.

Bertan duzue diskoaren "sanplerra" zeinetan kanta bakoitzaren zatitxo bat entzun ahalko duzuen aurrerapen gisa:

Making of bideoa aurreko sarrera baten duzue eta informazio gehiago nahiko bazenukete, diskoak webgune espezifikoa du, honatz:

gaizkapenafiel.com/lagunartean.html

Argazkiak: Alain Asenjo

Aukera duzue CDa zuzenean niri erosteko bitartekorik gabe, eskertzen da eta laguntza guztia. Bi eratara, Tirikitrauki dendan edo hurrengo webgunean:

DISKOA EROSI / COMPRAR CD / BUY CD

HALA DZIPO, kantuak zahar-berritzen

2011-12-14T01:38:00.000+01:00

Aurtengo Durangoko Azokan lan aberasgarria heldu zen nire eskuetara, Barakaldoko Hala Dzipo Kultur Elkarteak argitaratutako diskoa alegia. Proiektu honen gidaritza David Nanclares eraman du, baina laguntzaile finak izan ditu ondoan, besteak beste: Asier Ercilla, Alberto Markos, Eider Zenarrutzabeitia, Idoia Kareaga, Asier Zubelzu, Rufoh edo Endika Lahaine esaterako. Hala ere nabarmentzekoa da diskoan berebiziko garrantzia dutenak elkarte honetan ikasten ari diren gazteak direla, 8-14 urte bitarteko ikasleek abesten dutelako diskoan.

Oinarrian 12 abesti tradizional berriztu eta gaurkotu egin dituzte moldaketa oso interesgarriekin. Horretaz gain eduki gehiago ere badatoz lan honetan: kanten letra eta partiturak, karaoke bertsioak eta baita midiak ere. Begira nola burutu zuten lan eder hau:

Benetan eskertzekoa horrelako elkarteek bultzatzen dituzten ekimenak, honetaz danok baliatzen baikara.

Informazio gehiagorako: Hala dzipo Elkartea

Elizagoien ahizpak

2011-12-12T21:51:00.000+01:00

Etxalargo Itsaso eta Irune Elizagoien azken urteetan ezagun egiten ari dira trikitixa txapelketetan izaten ari duten arrakastagatik.

Izan ere, ahizpak, 11-12 urterekin lehendabiziko txapelketak irabazten hasi ziren eta egun Euskal Herriko txapeldunak dira nahiz eta oraindik ere oso gazteak izan. Orain aste pare bat esaterako Zaldibarko txapelketa irabazi zuten, bertan egoten den mailaren adierazgarri. Haien irudiak eta bideoak ikusteko webgunerik egokiena Txoko Musikala duzue, bertan azken urteotan txapelketetan izan duten ibilbidea ikusi eta entzun ahalko duzuelako. Bertan eredutxo bat:

Facebook-en badute perfila haien berri jasotzeko, hona hemen: http://ttiki.com/33275
Zorterik onena bikotearentzako, trikitixak behar dituelako belaunaldi berri eta emankorrak!
Bideo eta irudia: Txoko Musikala

"Erramunen soinua", liburu-diskoa

2011-12-11T13:59:00.001+01:00

Bizkaiko Trikitixa Elkarteak liburu-diskoa kaleratu du Durangoko Azokarako, Erramunen soinua izenekoa. Hauxe da lan honetaz esaten dutena:

“Erramunen soinua umeei zuzenduriko Bizkaiko Trikitixa Elkartearen argitalpena da, liburu eta diskoz osatua. Unai Elorriagak idatzitako istorioan, pertsonaia xelebre batzuei gertatzen zaizkien pasadizoen bidez, trikitixaren nondik-norakoak azaltzen dira: nondik datorren, zelan jotzen den, zeintzuk erritmo erabiltzen diren, etab. Ipuinean zehar pertsonaiek hainbat kanta abesten dituzte, diskoan biltzen direnak hain zuzen ere. Kanta horien letrak ipuinean txertaturik ageri dira, baita pieza horiek trikitixarekin jotzeko partiturak ere. Partitura hauek trikitixa ikasleei zuzenduriko oharrekin ageri dira, kasu bakoitzean nota non dagoen edo zein atzamarrekin jo behar den jakiteko. Liburuaren amaieran aipaturiko oharrak ulertzeko argibideak eskaintzen dira. Musika egitearen eta transkribatzearen ardura Xabi Aburruzaga eta Jose Urrejolarena izan da; Unai Elorriagak idatzitako letretatik abiatuz pieza berriak sortu dituzte. Eider Eibarrek proiektu honetan hain garrantzitsuak diren irudiak egin ditu. Istorio, musika, irudi eta partiturez gain, jolasak ere aurkituko dituzue lan honetan."

Elkartearen webgunean bertan eros dezakezue jadanik.

Iturria: Bizkaiko Trikitixa Elkartea

ESNE BELTZA, freedom / 3 Kolpetan

2011-12-07T19:05:00.001+01:00

Blog honetan orain dela hilabete batzuk Esne Beltzak lan berria preparatzen ari zela adierazi genuen eta lan hori eskuragai dago jadanik. Durangoko Azokarako kaleratu dute eta edizio berezi baten erosteko aukera izan dugu bertan, izan duten arrakastarekin agortuta ez badaude agortzear izango direlako. Baina lasai, edizio normalak eduki berdinak dituelako; DVD, argazki-liburuxka eta CDa alegia.

DVDan kontzertu ezberdinetako irudiekin egindako muntaia sartu dute eta batetik bestera egiten dituzten aldaketak oso ondo eginak daude egia esan. Zaila da Esne Beltzak zuzenean duen esentzia hori islatzea, baina nire ustez lortu dute DVD honetan Plateruena, Japonia eta Donostian emandako emanaldien grabazioekin. Bestetik argazkiez hornitutako liburuxka ere badu lanak barruan, Saioa Cabañas (Gauilunak) egindakoak hamaika kontzertutan zehar. Irudien aukeraketa paregabea da eta egitasmo honen inguruan biltzen diren pertsona guztiak ikusi eta ezagutzeko abagunea ematen du. Azkenik CDa dugu, zeinetan 4-5 bertsio daude, zuzenekoetan entzun izan dugun "Bozgorailuetatik" kantaren moldaketa tartean. 10 bat konposizio berri ere badakartza diskoak, aurreko lanen harian, singlea den "Nahi dut" barne. Hona hemen DVD/CDaren trailerra eta singlea:

NAHI DUT singlea entzun

Exitua bermatuta dauka lan honek eta Azokan ikusi ahal izan dudanagatik, talde honen ibilbidean mugarri bat izango dela esango nuke. Nik behintzat orain gutxirarte zerbait entzuten nituen baina talde honen gidaria hobeto ezagutzeko aukera izan nuenetik, hurbilagotik jarraitzen ditut eta geroz eta gehiago harritzen naute. Izan ere asko pozten nau egitasmo honen arrakastak, proiektu baten hasieratik sinisten denean beranduago edo lasterrago fruituak ematen dituelako eta esnebeltzatarrak orain jasotzen ari dira hasierako lan guzti horren emaitza, entzuleen babes eta jarraipen sutsua alegia. Apustu handia egin zuten hasierako lan harekin eta euskal musikaren mundua irauli egin dute orduz geroztik.

Proiektu ona eta lantalde hobeagoa, osagai apartekoak lan borobil hau sortzeko. Bejon daiela!

DVD/CDaren azala

TRIKI Musikaren Historia Tailerra

2011-12-01T23:31:00.001+01:00

Tailer interesgarria antolatu dute Erromoko Kultur Etxean hilabete honetan. Bertan hiru parte hartzaile arituko dira: Agus Barandiaran eta Ander Hurtado (Korrontzi taldeko kideak) eta Ritxi Aizpuru (Baga-Bigako musika editorea). Zita abenduaren 16an da, arratsaldeko 19:00etan. 50 pertsonako kopuru itxia ezarri dute eta izen ematea bihartik aurrera zabalik egongo da ondoko telefonoetan: 944319280 / 944649133. Euskaraz izango da eta doanekoa da.

Bertan trikiti musikaren bilakaera aztertuko dute eta saio praktikoak ere izango dira edukiak hobeto lantzeko.

Nazioarteko Trikitixa Jaialdia iruditan (Bizkaia)

2011-11-22T12:21:00.001+01:00

Aurreko larunbatean Getxon ospatu zen Nazioarteko Trikitixa Jaialdiko irudiak dituzue bertan. Lehendabizi Kris eta Xabi Solano agertu ziren DZaren laguntzaz, eurek konposatutako pieza ederrak joz. Ondoren Galiziatik Bieito Romero, Luar Na Lubreko sortzailea, etorri zen eta besteak beste hain ezaguna den O Son Do Ar pieza eskaini zuen beste musikari biren laguntzaz. Euskal Herria eta Kataluniako uztartzea ordezkatu zuten Urtzi Enrikez eta Marc del Pino agertu ziren hauen ostean eta saio landua eskaini zuten pieza herrikoi eta konposizio propioak nahastuz. Gerora Kataluniako Guillem Anguera, Txala taldeko partaidea, taularatu zen beste bi musikariekin eta azkenik Kepa Junkera irten zen, Jose Luis Canalekin batera, jaialdiari bukaera emateko.

Bertan jaialdia argazkitan:

Argazkiak: Asier Olazar eta Gaizka Peñafiel

AURRERAPENA: Lagunartean

2011-11-17T23:50:00.001+01:00

Blogarekin hasi nintzenetik hamaika diskoz hitz egin dut eta ez nuen uste inoiz nire diskorik aurkeztuko nuenik. Baina gaurkoan azken urte erdian egindako lana aurkezteko momentua heldu da. Lagunartean du izenburu eta hurrengo astean salgai jarriko da, Baga-Biga diskoetxearen eskutik. Momentuz, azala eta making of-a (aurrerapen kantua duena) ikusi ahalko dituzue. Laster sarrera konpletuago bat egingo dut zehaztasun gehiagorekin, baina ikusiko duzuen moduan gure soinu txikiak gutxitan bezain beste ordezkari izan du, trikitixa oinarritzat ez duen diskoa dela kontutan hartuz. Goza dezazuela...

Nazioarteko Trikitixa Jaialdia Bizkaian

2011-11-09T02:52:00.003+01:00

Orain egun batzuk Nazioarteko Trikitixa Jaialdia ospatu zen Andoainen eta bertaratu zen jendearen iritziz oso egun ederra izan zen hura.

Beste urte batzuetan bezperan egiten zen Bizkaian jaialdia, baina aurten aldatu egin da eta azaroaren 19an ospatuko da Algortako Andres Isasi musika eskolan, arratsaldeko 19:00etatik aurrera. Ohitura den legez, kontzertuaren ostea trikisession-a egingo da Inguruko Glass tabernan.

Jaialdi honek Andoainen ospatu zenarekin aldaratuta parte hartzaile ezberdinak ditu, honakoak alegia:

- GALIZIA: Bieito Romero (Luar Na Lubre), Xan Cerqueiro eta Diego Barral

- KATALUNIA: Guillem Anguera, Hector Beberide eta Isidre Sans

- EUSKAL HERRIA: Kepa Junkera eta Jose Luis Canal, Kris eta Xabi Solano, Urtzi Enrikez eta Marc Del Pino (katalana)

Sarrerak salgai daude jada 8 euroren truke Algortako Kultur Etxean eta baita interneten ere (www.generaltickets.com). Egunean bertan ere erosi ahalko dira takilan.

Iturria: Bizkaiko Trikitixa Elkartea

Nazioarteko Trikitixa Asteburua 2011

2011-10-14T00:51:00.005+02:00

Oñatiko Lizargarate Trikitizale Elkarteak urteak daramatza jaialdi eta bestelako ekimenak antolatzen eta oraingoan proposamen aparta egin dute Nazioarteko Trikitixa Jaialdiaren hurrengo egunerako, urriaren 29rako alegia. Begira zer nolako egitaraua:

11:00-12:00: Workshop musikari kanpotarrekin, Joseba Tapiak gidatua.

12:00-12:30: Pikoteoa

12:30-13:30: Workshop bertako musikariekin, Joseba Tapiak gidatua.

13:30-14:30: Kalejira herrian zehar.

18:30-19:30: Soinu emanaldia UMEREZ tabernan:

-Cryille Brotto eta Alexandra Lacouchie

-Izer, Laja eta Narbaiza

-Elustondo anai arrebak

19:45-20:45: Soinu emaldia PAKO tabernan:

-Stephen Doherty eta Patric Doocey

-Jorge Arribas eta Diego Galaz

-Tapia eta Leturia

20:45- Kalejiran afaltzera

21: 30- Kiroldegiko frontoian HERRI AFARIA eta gero ERROMERIA:

-Oñatiko taldea (Agurtzane, Ezozi, Gorka eta Iñaki)

-Jon Ostolaza, Mikel Alkorta, Iker Goenaga eta Tapia

-Egurrola, Jauregi eta Berastegi

2:30- Poteoa Oñatiko tabernetan

Afarirako txartelak erosteko azken eguna urriaren 23a izango da eta salgai daude Oñatiko, Umerez, Urbia eta Kultur Etxean.

(kalitatezko irudia argitaratzean eguneratuko da)

X. Nazioarteko Trikitixa Jaialdia

2011-10-14T00:31:00.004+02:00

Azken hamarkadan finkatu den Nazioarteko Trikitixa Jaialdiaren zita berria dugu urriaren 28an. Aurten Andoaingo Bastero Kulturgunean ospatuko da gaueko 22:00etatik aurrera eta "Trikitixa eta Biolina" izango da ardatza.

Jaialdian musikari hauek arituko dira:

- Arrabots taldea

- Jon Ostolaza eta Juan Arriola

- Maixa, Ines, Maite eta Xabier Zeberio

- Cyrille Brotto eta Alexandra Lacouchie (Okzitania)

- Stephen Doherty eta Patrick Doocey (Irlanda)

- Jorge Arribas eta Diego Galaz (Gaztela Leon)

Sarrerak kutxatilan bertan erosi ahalko dira jaialdia hasi baino ordu bete lehenago edo bestela urriaren 13tik aurrera Kutxanet bidez.

(kalitatezko irudia argitaratzen denean eguneratuko da)

Iturria: Euskal Herriko Trikitixa Elkartea

Ai Ene taldea

2011-10-08T23:10:00.004+02:00

YouTuben nabigatzen noizbehinka altxorren bat topatzen dugu eta nik batekin topo egin nuen orain hilabete batzuk, Iosune Marin kantautorearen bideo batekin alegia. Honen bitartez ezagutu dut talde berri hau, Ai Ene izenekoa. Iosunek gitarra eta ahotsa izaten ditu lagun, baina bertan trikitiak ere badu bere lekua Eneritz Bengoetxearen eskutik. Neska bi hauez gain bi mutilek osatzen dute formazioa, Adrian Elustondo baxuan eta Iñaki Letamendia perkusio eta baterian.

Bertan dituzue ekitaldi bateko bideo pare bat, eta nahiz eta oso ondo ikusi eta entzuten ez diren, nabari da zein ondo landuta dagoen proposamena. Gainera oso errepertorio anitza dute, erreta ez dauden kanta askorekin eta baita konposizio propioekin ere.

Edozein txokotan eurekin kontatu nahi izan ezkero bertan duzue haien e-posta helbidea: aienetaldea@gmail.com

Txoko Musikala

2011-10-08T22:50:00.004+02:00

Azken asteetan biziki jarraitzen dudan txokoa gomendatu nahi dizuet, Infernuko Hauspoa blog honen "senitarteko" bolga. Andoni Lizarralde bergararrak kudeatzen du txokoa eta material ikaragarria biltzen ari da pixkana-pixkanaka.

Bertan txapelketen edo bestelako emanaldien bideo, argazki, soinujoleen fitxategi, etab.ez gozatzeko aukera izango dugu. Gainera material guztia kalitatezkoa eta oso konpletua.

Animatu eta bisita egin ezazue, ez zarete damutuko eta!

Txoko Musikala

Landakandaren bizitza liburu baten

2011-10-08T22:27:00.004+02:00

Jose Ramon Zubizarreta, "Landakanda" ezizenaz ezagutzen duguna, badu zer kontatu bizitzan zehar bildutako bizipenen inguruan eta horrexegatik Euskal Herriko Trikitixa Elkarteak liburu biografikoa argitaratuko du azaroaren bukaeran.

Miel Anjel Elustondo azpeitiarrak hartu liburua idaztearen ardura eta Durangoko Azokan salmentan izango dugu. Bertan 79 urteko panderojolearen pasadizoak irakurri ahalko ditugu. Oraindik emanaldiak eskaintzen dabil eta ez dauka belaunaldi gazteengana hurbiltzeko arazorik azkoitiarrak. Lajarekin batera jo izan du azken hamarkadetan eta honekin lau disko ditu grabatuta. Seguru pasarte interesgarri asko irakurri ahalko ditugula liburuan...

Geure Kolkotik 2011

2011-10-08T21:54:00.004+02:00

Iaz bildumaren lehendabiziko alea kaleratu zuen Euskal Herriko Trikitixa Elkarteak eta bigarrena plazaratu berri dute. Bigarren lan honetan eskarmentu handiko trikitilarien piezak entzun ahalko ditugu, konposizio berriak denak.

Parte hartu duten soinujoleak honakoak dira: Eneko Dorronsoro, Iker Goenaga, Jose Luis Garmendia "Laja II.a", Tomas Soraluze "Epelde" eta Lurdes Alkorta.

Diskoa salgai dago jada besteak beste Elkar webgunearen bitartez.

ESNE BELTZA 3.0

2011-08-16T00:35:00.005+02:00

Esne Beltza taldea bere hirugarren lana izango dena preparatzen dabil eta oraingo honetan CDaz gain DVD bat ere argitaratuko dute biran emandako irudiekin eta baita abuztuaren 18an Donostian eskainiko duten kontzertuarekin. Egun honetan gainera gonbidatu bereziak izango dituzte, aurrerago ikusiko dituzue zeintzuk... baina potenteak dudarik ez.

Diskoaren izenburua "Hiru kolpetan" izango da eta abendurako plazaratuko dute, Durangoko Azokan salgai egongo delakoan. Musikaz gain irudi eta testuek garrantzia handia izango dute lan honetan, proiektu multimedia itzela osatuz. Horren ondoren atsedenalditxo bat hartuko dute zuzenekoei dagokionez, pilak kargatu eta berriz ere plazak betetzeko.

Animo eta zorterik onena Xabi Solano eta konpainiarentzako!

Argazkia: Saioa Cabañas (www.gauilunak.com)

DISKOA GRABATZEN

2011-08-11T14:29:00.006+02:00

Hilabeteko isilunearen ondoren, berriekin nator. Blogean beste musikari eta taldeen diskoen gaineko informazioa ematen dugu eta oraingoan, neureaz hitz egite tokatzen zait.

Aste Santuko oporraldian gitarra hartu eta 10 kanta azaleratu ziren, bai musika eta baita hitzez ere. Gauean sortu eta hurrengo egunean grabatzen nituen eta horrela maketatxoa osatu nuen egun gutxitan. Ingurukoekin konpartitu eta ganorazko disko bat kaleratu behar genuela erabaki genuen. Hori da azken bi hilabetetan egiten aritu garena eta momentu honetan azken moldaketak eta kolaborazio berezi bat baino ez zaigu falta.

Argazkia: Asier Olazar

Triki diskoa izango ez den arren, izango du bere lekua soinu txikiak ere eta hurrengo argazkietan ikusten duzuen moduan hauspoa astindu genuen estudioan. Irudiotan, diskoan parte hartu duen Xabi Solano ikusi dezakezue, baita neure lagun eta laguntzaile fina den Asier Olazar eta ni neu azkenekoz. Ekozipen musikalaz arduratzen dena ere trikitilaria da, Asier Ercilla hain zuzen ere. Azken kolaborazio berezia ere trikitixarekin etorriko zaigu, baina momentuz ez dugu izenik emango...

Diskoaren grabaketa eta ekoizpen prozesua hurrengo webgunean jarraitu dezakezue:

www.gaizkapenafiel.com/GRABATZEN/GRABATZEN.html

Informazio gehiago emando dizuet laster, baina bien bitartean eskertuko nizueke berria zabaltzen joatea, ea lortzen dugun lanari zabalkunde polita ematea. Laster arte!

HAUSPO ARTEAN I - Harkaitz Allur

2011-07-07T00:39:00.002+02:00

Orain dela hilabete batzuk Hauspo Artean egitasmo honen berri eman nuen eta lehendabiziko atala dugu jada ikusgai. Hastapeneko saio honetan Harkaitz Allur trikitilaria gehiago ezagutzeko aukera izango dugu. Laster bigarrena!

Faborez 05

2011-06-27T20:36:00.003+02:00

Aurreko urteetan bezala kalean da jada Faborez serieko 5. alea, Euskal Herriko Trikitixa Elkartearen eskutik. Oraingoan honako bikoteek parte hartu dute:

- Olarte eta Urdangarin

- Elortza anaiak

- Harkaitz Allur eta Idurre Arriola

- Astiazaran II.a eta Izer

Lana Donostian aurkeztu dute egunotan eta ohitura den legez, erromeria antolatu dute uztailaren 4ean, Zumarragako Zelai Arizti kultur etxean albuma aurkezteko. Emanaldia 20:00etan izango da eta diskoko kantez gain, pieza gehiago ere eskainiko dituzte bikoteek.

Donostian egindako aurkezpenaren irudia

XIV. Nafarroako Trikitixa Eguna

2011-06-14T13:22:00.005+02:00

Igande honetan, ekainak 19, ospatuko da XIV. Nafarroako Trikitixa Eguna Erronkariko ibaxan. Goizeko 10:30etatik aurrera zonaldeko herrietatik kalejirak izango dira nagusi eta bazkalordua baino lehen, 13:30etan alegia, topaketa egingo da Izabako Garatxandi parkeko anfiteatroan. Bertan omenaldiak eta dantzak burutuko dira. Herri bazkaria Erminea frontoian egingo da eta ostean Izer eta Alabier, Imanol Astiazaran eta Lixurdixo arituko dira giroa berotzen. 18:30etan kalejira erraldoia egingo da herriko kaleetatik eta 20:00etan jaiaren amaiera izango da.

Bertan duzue eguneko kartela eta egitaraua:

Klikatu irudian handiagotzeko

Xabi Solano "Finlandia" saioan

2011-06-09T23:51:00.004+02:00

Xabi Solano soinujolea ETBko "Finlandia" saioan egon zen aurreko asteburuan eta ikusi ezin izan zenutenentzako bertan dituzue publikatu dituzten zati ezberdinak. Ikusi dezakezuen moduan elkarrizketa anitza izan zen, umoretsua baina mamiduna ere berean. Besteak beste "junkerista" edo "tapista" den ere galdetu zioten; erantzuna zein izan zen jakiteko, bideotan duzue...

- Elkarrizketa:

- Xelebrities:

- Bateria jotzen:

- Atrebentzia haundiya ez bada:

- TrikitX:

- Bozgorailuetatik:

"Ultramarinos & Coloniales", Junkeraren disko berria

2011-06-09T01:57:00.007+02:00

Egunotan eman dute jakitera diskoaren izenburua, "Ultramarinos & Coloniales" alegia, baina nik azala dakarkizuet primizian. Diskoa ekainaren 21ean aurkeztuko da eta honezkero badago aukera iTunes-en bidez aurretiaz eskatzeko.

12 kantek osatuko dute lana eta Kepak 2006an "Hiri" diskoa kaleratu zuenetik, hauxe izango da bere abesti berriak dituen hurrengoa. Bertan uzten dizkizuet piezen izenburuak, kuriosoak sikeran:

1. Zokale

2. Someneiro & Sardinale

3. Rekaldelhi & Nervyork

4. Lisbao

5. Alfakoli

6. Gatzunaskao & Santamaricaibo

7. Riberhia

8. Iturriboca & Monteviderrieta

9. Quitto & Correocife

10. Fueros Aires

11. Barranquilla Barrena

12. Bilbotik San Frantziskora

Bertoko taldearen XV. urteurrena

2011-06-05T23:57:00.015+02:00

15 urte igaro dira Bertoko taldea abian jarri zenetik eta asteburu honetan ospatu dute urteurrena. Ibilbide horren etapa bat bete nuen eta horrexegatik zertzelada batzuk emango ditut nire esperientzia oinarritzat harturik.

Guraso talde batek jarri zuen taldea martxan kultura arloan eta musikan zehazki zegoen hutsune bat bete nahiaz. Musika eskoletan eskaintza formalagoak bazeuden, baina talde bat osatzeko ikuspegi akademikotik harago joan behar izaten da eta horrexegatik bildu, irakasleak bilatu, udal lokal bat atondu eta Bertoko Soinu Tresnen Elkartea sortu zen Zamudion. Lehendabiziko esker ona haientzako, hutsetik musikazale askoren ametsa bete ahal izateko egitasmoa eraiki zutenei.

Ni bigarren urtean hasi nintzen bertan trikitixa ikasten, 1997an hain zuzen ere. Bertan urtetxo batzuk eman nituen, irakasle paregabeen gidaritzapean. Ezin ahaztu Koldo Gaztañaga, Edurtzeta Ania, Harkaitz eta Iker Allur... zenbat doinu, zenbat barre, zenbat pasadizo, zenbat denbora 4. pisuko lokal haretan. Haien pazientzia eta dedikazioari zor diet naizen apurra, maila profesionalean eta batez ere pertsonalean, haien konpainian gizondu bait nintzen.

Mende aldaketarekin batera bizi izan zuen Bertokok loraldirik ederrena, trikitilari eta panderojole mordoa pilatzen bait zituen eta hori baino garrantzitsuagoa, kudeaketa eta giroa ezinhobeak zirelako. Ekitaldiak adin, genero, estilo eta izakera ezberdinez koloreztatzen genituen. Ez genuen perfektu jotzen, ez genuen errepertorio bukaezina,... beste zerbait geneukan; nork daki zer. Emanaldi guzti horietan parean izandakoei ere eskerrik asko, gehienei haien laguntasunagatik eta besteei, konpartitutako melodiengatik sikeran.

Orokorrean momentu itzelak bizi izan genituen egia esan. Bat nabarmentzekotan 2002an antolatu genuen Euskal Herriko Trikitixa Eguna, hilabete asko lanean eman ondoren fruitu ederra batu genuen eta udaberri hartan. Milaka trikitizale bertaratu ziren Txorierrira eta eguraldia lagun, inoiz ahazten ez den bizipen horietakoa izan zen. Hala ere, emanaldi xumeenak ziren Bertokok zeukan arimaren erakuslerik onenak. Hauetan ikusten bait zen jendearen konpromisoa, sakrifizioa eta musikareriko maitasuna. Izan ere batzutan ahaztu egiten zaigu horrelako taldeen ardatza musika izan behar dela, beste guztia bigarren mailakoa izanik.

Sasoi ilunak ere etorriko ziren gero; Hertzainak taldeak esaten zuen moduan, "barearen ostean dator ekaitza". Baina ez ditzagun hautsak astindu, horrela gauza gutxi lortzen baita. Hobe gogoeta sakona egitea urteetan pilatutako afera guztiak bideratu eta egunen baten ahazteko.

Nik behintzat egin dut nire hausnarketa; ez ditut nire sustraiak ukatzen, harro nago egindakoaz. Baina denbora larregiz zabalik mantendutako atea itxi egin berri dut, nahiz eta lagun onen gomendioei jarraiki lehio bat zabalik utzi dudan, badaezpada. Azken esker ona izendatzerik behar ez den horientzako, onerako eta txarrerako ondoan ditugunontzat, justuak izaten saiatzen direnentzat, ikuspegi bateratzailea duten horientzat, laguna defendatzeko aurrera pausua ematen dutenentzat,... ESKERRIK ASKO!

Mari Tere Zugaza-Artazari omenaldia

2011-06-02T00:28:00.004+02:00

Egun gutxi barru Euskal Herriko Trikitixa Eguna ospatuko da Iurretan eta bertan Tiliño trikitilaria omenduko da. Hala ere orain dela egun gutxi bere emaztea, Mari Tere Zugaza-Artaza, zendu zen eta omenaldi emozionantea eskaini zioten aurreko ostiralean. Kulturaren alde urte asko lanean eman zuen Mari Terek eta esparru askotan gainera. Dantzan, antzerkian, musikan, irakaskuntzan,... euskaltzale nekaezina zen eta urteetan emandako guzti hori eskertu nahi izan zioten bere agurrera bertaratu ziren guztiek. Horrelako pertsonek uzten duten hutsunea bete ezina den arren, seguru norbaitek hartuko duela lekukoa.

Omenaldian gure soinu txikiak ere lekua izan zuen eta bertan izan ziren Joseba Tapia, Iñaki Zabaleta, Motriku edo Kepa Junkera esaterako.

Mari Tere, Goian bego

Argazkia: Iban Gorriti

Oñatiko trikitixa ikasleen maketa

2011-06-02T00:11:00.004+02:00

Oñatiko Jose de Azpiazu musika eskolako ikasleek maketa grabatu dute eta atzo aurkeztu zuten jendaurrean. San Anton plazan erromeria antolatu zuten lan hau aurkezteko eta ikasle guztiek parte hartu zuten bertan, 55 trikitilari eta 20 panderojole hain zuzen ere.

Lan honen gidaritza Harkaitz Allur irakasleak hartu du bere gain eta dudarik ez dago egitasmo motibatzaile eta aberasgarria izan dela ikasleentzako. Normalean jotzen dituzten 35 piezekin osatu da diskoa eta salgai dago musika eskolako idazkaritzan 6 euroren truke.

Bertan duzue honen berri ematen duen erreportaia:

Iturria: goiena.net

Xabi Arakamak Trikizio utziko du denboraldi batez

2011-05-16T01:12:00.004+02:00

Trikizioko soinujole eta abeslari ezagunak denboraldi batez utzi behar du taldea ahotsean arazo batzuk direla eta. Orain dela gutxi Ze Esatek! taldea utziko zuela irakurri genuen eta oraingoan urte askoz gidatu duen formazioa alde batera utzi beharko du, hilabete batzuetarako ez bada ere. 2012rarte agian ezingo da bueltatu, baina seguru indarrez etorriko zaigula orduan.

Bere hutsunea pertsona bik beteko dute. Alde batetik Etxe abeslaria izango dugu eta bestetik, Ruben Isasi trikitilaria.

Bertatik ere animo asko eman nahi dizkiogu Xabiri, guztiz berrindartu eta lehenbailehen itzuli daitela. Eutsi Xabi!

Argazkia: Xavier Minguella

Erromeria Eguna Bergaran

2011-05-05T18:41:00.003+02:00

Erromeria Eguna ospatuko dute Bergaran hilaren 14ean. 12:30etan emango diote hasiera Bergarako trikitilari eta dantzariek kalejira eta erakustaldi batekin. Gero bazkaria izango da eguerdiko 14:30etan eta ondoren, erromeria, triki-poteo eta dantzaldia antolatu dituzte bertaratzen direnentzako.

Bazkarirako txartelak salgai daude 15 €-ren truke Bergarako Kultur Etxean eta Ariznoa eta Deportibo tabernetan. Informazio gehiagorako Kultur Etxera deitu: 943 77 91 59

Euskal Herriko Trikitixa Eguna

2011-05-05T00:23:00.005+02:00

Hilabete baino ez da geratzen Euskal Herriko Trikitixa Egunerako. Aurten aurretiaz esan bezala Iurreta-Durangon ospatuko da ekainaren 4ean. Ekitaldiak goizean hasiko dira eta iluntzerarte gutxienez luzatuko dira. Bertan duzue egitaraua:

11:00etan Iurretan bildu. Ondoren kalejira Iurreta eta Durangon
12:30etan Tiliñori omenaldia Iurretako plazan
14:30etan Bazkaria Landakon
17:30etan GOZATEGI taldearekin erromeria
19:30etan jaiaren amaiera

Bazkarirako tiketak 15 €-ko salneurria dute eta aldez aurretik erosi behar dira, egunean bertan ezingo direlako eskuratu. Tiketak erreserbatzeko e-posta bat bidali helbide honetara trikitixa@trikitixa.net edo telefono zenbaki honetara deitu 943 83 28 28. Maiatzaren 26a baino lehen burutu behar da erreserba eta ordainketa ere bai.

Gogoratu kanta bat dagoela denok batera jotzeko eta letra ere badaukala, hurrengo triptikoan ikusi ahalko duzuena. Klik egin irudiotan handiago ikusteko.

Besterik gabe, ea bertaratzen diren/garen guztiok ondo baino hobeto pasatzen duten/dugun.

Iturria: Euskal Herriko Trikitixa Elkartea

INPERNU, Zero Sette modelo berria

2011-05-02T21:49:00.004+02:00

Tirikitrauki dendatik heldu zaigu gaur berria, Zero Sette markak modelo berria aurkezten duela alegia. Honen izena Inpernu izango da eta momentuz bi koloretan ekoiztuko dituzte. Batetik morea, disko izenekoa eta bestestik marroia.

Norberak probatzea da onena, baina Antikoak baino gozo eta sendoagoak direla baieztatzen dute. Eskumako teklatua laburragoa da eta horrexegatik botoiak gertuago geratzen dira elkarrengandik.

Interesaturik baldin bazaudete, webgunearen bitartez jarri zaitezkete harremanetan Tirikitraukiko arduradunekin:

TIRIKITRAUKI

Irudiak: Tirikitrauki

Kepa Junkeraren lan berria

2011-04-14T21:00:00.005+02:00

Martxan dago jada berriz ere makineria eta maiatzaren bukaera edo ekainaren hasierarako Kepak lan berria argitaratuko du. Lehengo errotik, berak sortutako kanta berriak entzun ahalko ditugu disko honetan eta berak azaldutakoagatik, Bilboko Alde Zaharrean ematen den fenomeno bat izango du ardatz. Momentuz zehaztasun gutxi ditugu horren inguruan, baina kaleratze data hurreratu ahala seguru detaile gehiago ezagutuko ditugula.

Bertan duzue EITBko "Ni más ni menos" programan egindako agerpena, zeinetan besteak beste diskoaren inguruan mintatzen den eta baita pieza bat jo ere egiten duen.

EHko Trikitixa Egunerako kanta

2011-04-05T12:02:00.006+02:00

Ekainaren 4ean ospatuko da Euskal Herriko Trikitixa Eguna Durango-Iurretan eta Oskar Estanga trikitilariak biribilketa bat sortu du bertaratuko diren guztien arten jotzeko. Abestiaren izenburua Tiliño da, Iurreta inguruko trikitilari ezagunari erreferentzia eginez. Bertan duzue kanta entzuteko aukera eta baita partitura ere hurbiltzeko asmorik baduzue lantzen joateko.

KANTA
PARTITURA

HAUSPO ARTEAN

2011-03-29T00:05:00.004+02:00

Orain gutxi Euskal Herrian 10.000 trikitilari inguru garela irakurri nuen, baina ezagutzen ditugu arrazoi bategatik edo besteagatik nabarmendu diren horiek?

Trikitixaren munduan murgilduta gaudenok jakin badakigu soinujole hauek oso garrantzitsuak direla gure ekosistema honetan. Batzuk txapelketetan aritzeagatik, beste batzuk kantagintzan, asko irakaskuntzan... Zergatik bada ez ezagutu haien bilakaera, interes, ikuspegi edo egindako ekarpenak?

"Hauspo Artean" proiektu honen bidez, trikitilari horien testigantzak jaso eta helaraziko ditugu, teknologia berriek ematen duten aukera aprobetxatuz. Bideoz grabatutako erreportaje laburrak izango dira, errez ikusteko moduko elkarrizketa arinak. Behin-behineko zerrenda bat badago eta batzuekin harremanetan nago nondik norakoak zehazteko, baina zer esana duen soinujoleren bat inguruan baduzu edo zeure burua ekimen honen barruan ikusten baduzu, e-posta bat bidali edo iruzkin bat egin sarreran eta zurekin kontaktuan jarriko naiz.

Asmoa Aste Santuko oporraldietan lehendabiziko atala argitaratzea da. Maiztasun finkoa lortzea zaila izango den arren, ahalik eta saio gehien kaleratzea da xedea.

Adi beraz, laster lehendabizikoa izango baitugu gure artean eta.

"Gezurra ez da egia", Imuntzo eta Belokiren berria

2011-03-12T12:46:00.004+01:00

Hogei urte igaro dira "Jo ezak" lehendabiziko lana kaleratu zutenetik eta disko berriarekin datozkigu Imuntzo eta Beloki, "Gezurra ez da egia" izenburupean. Diskoa Elkar argitaletxeak plazaratu du eta azalean ikusi dezakezuenez diseinuan argazkiak berebiziko garrantzia du. Esango nuke estetikan behintzat modernitatearengatik apostatu dutela; musikalki entzun arte ezin jakin.

Diskoa aurkeztu zen orain dela egun batzuk eta salgai dago besteak beste Elkar atarian. Horra hor aurkezpeneko argazki bat ere:

Hor dituzue Elkarrek argitaratutako erreseina eta baita iragarkia ere:

"Gezurra ez da egia diskoan zertzeladaz beteriko triki-mundu espresibo anitzaz gozatu ahal izango dugu. Tradizioari loturiko piezetan, dantza soltearen graziak eta energiak harrapatzen gaituzten bitartean, bestelako kantuetan, musika moldaketa eta interpretazio bikainak, musika talde eraginkor bat, ideia garaikideak eta produkzio modernoa ere aurkitzen dira. Erromeriaren arima ikaragarri elikatzen duen egiazko jakia da disko honen benetako altxorra."

Eguneraketa. Spotify-n entzungai dago jada diskoa: Imuntzo Eta Beloki – Gezurra Ez Da Egia
Iturria: Elkar Argitaletxea

San Josetako Trikiti Jaialdia 2011

2011-03-02T12:02:00.007+01:00

Martxoarekin batera San Josetako Trikiti Jaialdia datorkigu. Hilaren 19an ospatuko da arratsaldeko 18:00etatik aurrera eta aukeratutako lekua, azken urteetan bezala Azpeitiko Izarraitz pilotalekua. Sarrerak 12 euroren truke lortu ditzakegu eta honako partaideak arituko dira:

Agirrebeña anai-arrebak eta Harkaitz Allur
Javier López Jaso eta Marcelo Escrich
Itxaso eta Irune Elizagoien
Esne Zopak
Edurne Iturbe eta Oihana Irastortza
Astiazaran anaiak eta Leire

Iturria: Euskal Herriko Trikitixa Elkartea

Eskualdeko Trikitilarien I. Topaketa, Okondon

2011-02-24T23:13:00.005+01:00

Arabatik datorkigu oraingoan gonbitea, izan ere martxoaren 27an Baserri Azoka ospatuko dute Okondon eta bide batez Eskualdeko Trikitilarien I. Topaketa antolatu dute. Herriaren kokapena ezagutzen ez duzuenentzat, jakin Aiarako Kuadrillan dagoela eta Bizkaiaren mugakide dela.

Martxoaren azken igande horretan goizetik hasiko dira topaketako egitasmoak. Bertan duzue eguneko egitaraua. Animatu eta hurbildu Okondora!

Imuntzo eta Beloki, lan berria prestatzen

2011-02-01T23:02:00.004+01:00

2007an "Gauaren Helduan" kaleratu zutenetik hamaika emanaldi eman dituzte eta lan berri bat kaleratzea erabaki du bikote gipuzkoarrak. Gauza gutxi dakigu momentuz, baina martxorako espero da eta erromeria diskoa izango dela ematen du.

Imuntzi eta Belokiz gain, Jimmy Arrabit, Arkaitz Miner eta Urbil Artola musikariek ere parte hartuko dute Elkar diskoetxeak argitaratuko duen lanean. Laster berri gehiago...

Argazkia: Ander Gillenea

SPOTIFY + TRIKITIXA

2011-01-25T14:57:00.005+01:00

Gehienok ezagutuko duzue Spotify plataforma; musika dohainik, legalki eta "streaming" bidez entzuteko programa. Ezagutzen ez duzuenontzat bertan duzue aurretiaz kaleratutako sarrera, zeinetan argibide gehiago ematen diren: "SOFTWARE GOMENDIOA: Spotify". Sasoi horretan ez, baina gaur egun gonbidapenik gabe deskargatu eta izena eman dezakezue hurrengo estekan: "Spotify Open". Beraz, aukera aprobetxatu, ez zarete damutuko eta!

Hilabete batzuk daramatzat Spotify-tik nabigatzen, musikari berriak ezagutzen eta estilo berriak deskubritzen, baina soinu txikiari eskainitako erreprodukzio zerrenda bat ere badaukat eta zuekin konpartitu nahiko nuke. Bertan duzue neure bildumatxoa, hamaika trikitilari eta soinujoleen kantekin. Ekarpenik baldin badituzue, eskertuko nizkizueke.

HAUSPOA - "TRIKITIXA"

GOSE, Korrika 17-ko kantaren egilea

2011-01-23T00:09:00.005+01:00

Korrika 17 gerturatzen hasi da, horrekin batera baita Korrika Kulturala ere eta ohitura den legez, kanta berria dakarkigute giroa berotzen hasteko. Izan ere "Euskalakari" izango da aurtengo leloa eta Ines Osinaga trikitilariaren GOSE taldeak sortutako abestiak ere izenburu berbera hartu du. Bertan duzue aurkezpeneko irudi bat eta baita bideoklipa ere kantaz goza dezazuen:

Argazkia: Saioa Cabañas (Gauilunak)

ZORIONAK ETA URTE BERRI ON! / 2010.a LABURBILTZEN

2010-12-20T23:32:00.007+01:00

Egun gutxi geratzen dira egutegia aldatzeko eta lehendabizi gabon jai zoriontsuak eta urte hasiera ona opa nahi dizkizuet. Hitzok ilustratzeko, panderoko ikasle batek urte amaierako afarira ekarri zigun zorion-postala erakutsi nahi dizuet. Egilea Etzozi Gandariasbeitia da eta akuarela teknikaz honako artelana egin zigun:

Eskerrik asko Etzozi, estimatzen da

Urtea amaitzear da eta garai egokia da azken 12 hilabeteetan gertatutako laburbiltzeko.

Blogari dagokionez, 80 sarreratik gora argitaratu dira aurten eta geroz eta jende gehiago pilatzen hasi da webgunearen inguruan; 11.000 bisita baino gehiago jaso ditu urte bitan eta parte-hartzea ere gora doa egunetik egunera. Horren adierazgarri dira Facebook-en dagoen orriak eskaintzen dituen estatistikak. Hauen arabera orrialdeak 430 lagun baino gehiago biltzen ditu, haien artean ia 400 erabiltzaile aktiboak dira, astean 200 bisita baino gehiago jasotzen ditu eta sarrera bakoitza 1000 aldiz baino gehiagotan ikusten da. Datu demografikoak ere eskaintzen ditu Facebook-ek, horra hor:

Irudian klikatu handiagotzeko

Bestetik, ez dakit nirekin ados egongo zareten, 2010.a Esne Beltza taldearen urtea izan dela baieztatzerakoan. Dudarik gabe arrakasta itzela lortu dute bigarren diskoarekin, hamaika kontzertu eskaini dituzte munduan zehar eta nire ustez garrantzitsuena, orduraino euskal musika askorik entzuten ez zuten pertsonengana indarrez heldu da. Hala ere, izan dira bestelako argitalpen garrantzitsuak, Joseba Tapiak lau urteren ostean kaleratutako lan berria edota Kepa Junkerak aurten amaitutzat eman duen euskal kanta tradizionalen trilogia esaterako. Formazio berrien diskoak ere argitaratu dira, besteak beste: Emon, Ze Esatek!, Sokaide edo Kherau. Eta ezin ahaztu urte asko hauspoa astintzen dabiltzanak, Gozategikoak alegia.

2010.a urte emankorra izan da dudarik gabe!

"Infernuko Hauspoa" Argazki Lehiaketa 2010

2010-12-20T13:12:00.007+01:00

Azkeneko urteetan bezala, ikasleei zuzendutako lehiaketatxo bat martxan jarri genuen ikasturte hasieran eta honezkero irabazlea dugu. Bera Maider San Martin da eta argazki eder honekin lortu du lehendabiziko postua:

Urterik urtera maila gorantz doa eta aurten ere argazki paregabe asko jaso ditugu, hona hemen aukeraketa txiki bat:

Irudi guztiak ikusteko eta informazio gahiagorako, abiatu hurrengo webgunera:

ARGAZKI LEHIAKETA 2010

Oharra: argazkiok ezin dira inolaz ere erabili jabeen baimenik gabe.

Kherau, "Munduan Ortozik"

2010-12-03T22:37:00.004+01:00

Gutxitan gertatu zait disko bat lehendabiziko aldiz jartzean horrelako zirrara bat sentitzea. Izan ere Kherau taldearen aurkezpen lan honek izaera berezia dauka, nostalgikoa batzutan; energikoa bestetan. Partaideak ikusita, aurretiaz nekien kalitatezko albuma izango zela, baina egia esan ez nuen pentsatzen ezusteko hain atsegina hartuko nuenik. Gainera, aparteko sorpresa bat ere jaso dut diskoan parte hartu duten kolaboratzaileen zerrenda ikustean, Isabel Sierra trikitilariaz gain Eneritz Gorritxategi berriztarra ere ageri delako soinu txikia lagun duela. Azken hau ezagutzen ez dutenentzako, jakin "Ene Bada" taldeko buru zela Edurtzeta Ania panderojolearekin batera eta dudarik gabe Bizkaiko soinujole puntakoena dela.

Diskoa 11 kantaz osatuta dago eta bertsioez gain, badaude taldekideek asmatu dituzten obrak ere. Pieza batzuk nabarmentzekotan, benetan gozagarriak dira "Maritxu" eta "Zortzi nobio" kanta euskaldunak eta "Erresiñola" Kataluniako kanta tradizionala. Diseinuari dagokionez, azken boladan bogan dagoen estilo sinple eta minimalista da nagusi, nahiz eta argazkiekin jantzi duten liburuxka eta horrek asko aberasten duen lana.

Durangora hurbiltzen bazarete, benetan gomendatzen dizuet diskoa erostea, ez zarete damutuko eta. Bide batez, jakin Ahotsenea Aretoan saiotxoa eskainiko dutela igandean goizeko 11:00etan. Bien bitartean, kanta batzuk entzun ditzakezue honezkero taldearen MySpace orrialdean:

KHERAU - MySpace

Korrontziren "Infernuko Hauspoa"

2010-12-01T22:59:00.003+01:00

Korrontzi eta Oinkari dantza taldeek prest dute haien lan berria, "Infernuko Hauspoa" izenburupean aurkeztuko dena hurrengo orduetan. Musikariak, berrogei dantzarirekin batera arituko dira emanaldietan eta honezkero hamaika saio eskaini dituzte gure geografian zehar. Hurrengo asteburuan ere ikusteko aukera izango ditugu, Durangoko Azoka dela eta abenduaren 8an emanaldia eskainiko dutelako Plateruenan.

Disko berri hau Durangoko Azokan erosteko aukera izango dugu, Baga-Bigak izango duen stand-ean. Bien bitartean gaur kaleratu duten bideoklipa duzue bertan, arras ezaguna den kanta bat oinarritzat hartu dutelarik:

"Herria", proiektuaren lurreratzea

2010-11-25T22:53:00.008+01:00

Esku artean dugu euskal kanta tradizionalen trilogiaren azken lana, heldu da lurreratzeko momentua eta horrek baloraziotxo bat merezi du.

"Herria" da proiektua borobiltzen duena eta aurreko diskoetan baino parte-hartzaile gehiago daude bertan. Agian ez izen handikoak edo medioetan maiz agertzen direnak, baina niri behintzat interesgarriagoa iruditzen zait ezagutzen ez ditudan musikariak horrelako lan baten bidez ezagutzea, behin eta berriz komunikabideetan agertzen diren izar internazionalak entzutea baino. Musikari gehiago egoteak, sinple esanda musika gehiago egotea ere ekarri du. Nabaritzen da "Herria"-n askozaz instrumentu gehiago dagoela eta ez dela aurreko lanak bezain minimalista. Horren adierazle, aurkezpen singlea, "Egun Da Santi Mamiña" alegia:

Kepak berak aurreratu du argazki eta bideo material asko duela eta uste dut laster dokumental bat ikusteko aukera izango dugula hiru urte hauetako bidaiarekin. Alabaina, momentu honetan Junkera hara eta hona dabil diskoa aurkezten eta oso harrera ona jaso du egon den txokoetan. Hurrengo bideoa, aurkezpen eguneko momentu bat islatzen du eta ikusi ahalko duzue, erreportariaren hanka sartze batzuez gain, Keparen umorea zelakoa den, jotzen duen kanta zirikagarria dela argi dago eta.

Bi urte igaro dira Kepak lehendabiziko lana kaleratu zuenetik eta orduztik, hamaika hitz esan dira proiektu honen inguruan. Batzuk gozoak, beste batzuk garrats xamarrak eta beste batzuk gazi-gozoak. Baina uste dut hitz jario hori kaleratzen den edozein lan artistikorekin batera doala, denon gustura zerbait sortzea ezinezkoa baita. Nik neuk ere aitortu beharra daukat ez direla Kepak dituen disko guztien artean nire kuttunenak, baina uste dut izan duten eragina aintzat hartzekoa dela. Hor duzue hiru lan hauek biltzen dituen bideoklipa:

Diskoa Spotify-n duzue entzungai, horrela norberak bere balorazioa egin ahal izateko:

SPOTIFY - "Herria"

"Arnasak", Furundarena + Mendizabal

2010-11-24T22:37:00.004+01:00

Txistuaren arnasketa bertikala eta soinuaren arnas horizontalaren arteko uztarketa dela esaten du diskoaren erreseinak eta ezingo lukete hobeki deskribatu lan hau. Aitor Furundarenaren soinu handia eta ahotsa eta Garikoitz Mendizabalen txistua eta danbolina baino ez dira ageri diskoan, baina horrek ez dio konplexutasuna murrizten lanari. Niri behintzat nahiko formatu berritzailea iruditu zaidalako eta diskoa entzuten duzunean ulertuko duzue ez dela errez entzuten den lan horietakoa.

Trikitilariei zuzendutako gutizia bezala, jakin niri behintzat biziki gustatzen zaidan Furundarenaren "Slalom-a" kanta ezagunaren bertsioa ere sartu dutela. Ikaragarria kanta honetan Garikoitzek egiten duena, neu txistularia izanik, zoratzekoa iruditzen zaidalako bere interpretazioa. Horretaz gain, guztira 13 kanta dira eta badaude trikiti kanta gehiago ere, baita Phil Cunningham maisuaren bertsioren bat ere bai.

Gomendagarria entzutea eta onuragarria dudarik ez txistuaren osasunarentzako batez ere. Spotify-en entzungai duzue diskoa:

SPOTIFY - "Arnasak"

Horra hor aurkezpenean jo zuten piezetako bat:

Kherau taldearen aurkezpen lana

2010-11-15T14:05:00.006+01:00

Geroz eta gutxiago falta da Durangoko Azokarako eta diskoetxe guztiak martxan dute mekanismoa nobedade guztiekin garaiz iristeko. Lan berri horien artean, Kherau taldearen aurkezpen diskoa nabarmendu behar da. Oraindik ez dago informazio askorik, baina jakin badakigu taldekideen artean Alex Garcia trikitilaria dugula. Beste kideak ikusita, Korrontzi edo Adarrots taldeen estiloko lana izango dela aurreratuko nuke, baina entzun arte ezin ezer ere ez baieztatu.

Taldekideak

Diskoaren izenburua "Munduan Ortozik" izango da eta aurrerapen single-arena ordea "Zortzi nobio". Ez dakit Hiru Trukuk lehendabiziko diskoan Lezaman bildutako kantaren bertsioa edo kanta berria izango den, baina seguru harritzen gaituela emaitzak.

Baga-Biga diskoetxeak kaleratuko du eta printzipioz azaroaren bukaeran dendetan izango dugu Azoka heldu arte itxaron ezin dutenentzat. Informazio gehiago Kherau-ren blogean duzue.

Diskoaren azala

Euskal Herriko Trikitilari Gazteen Txapelketa 2010

2010-11-14T23:39:00.005+01:00

Zaldibarko trikitixa txapelketak ibilbide luzea dauka, XIX.a martxan dago eta. Aurten ere beraz zita dugu azaroaren 28an, igandea, arratsaldeko 17:30etan Olazar frontoian.

Hauexek dira parte hartuko duten bikoteak:

- Jone Uria eta Julene Otegi
- Ander Beldarrain eta Eider Iraola
- Ander Zabaleta eta Jone Pagaldai
- Edurne Errandonea eta Ander Beldarrain
- Itsaso Elizagoien eta Irune Elizagoien
- Ainara Alberdi eta Ane Alberdi
- Olatz Jaka eta Maider Ugalde
- Ane Balerdi eta Jokin Tolosa

Parte hartzaileek honako piezak jo beharko dituzte:

- Bizkaiko Trikitixa
- Porrusalda
- "Azkorgain" fandangoa (Jose Mª Iriondok egina)
- Arin-arina

Kanporaketarik egin ez denez, parte hartzeko ordena bertan zehaztuko dute zozketa bidez. Onenak irabazi dezala txapela...

Iazko txapeldunak (Iturria: Zaldibarko Udala)

IX. Nazioarteko Trikitixa Jaialdiaren kronika

2010-11-08T01:17:00.004+01:00

Beste konpromiso batengatik ez nuen joateko asmorik aurtengo Nazioarteko Trikitixa Jaialdira, baina plan aldaketa baten ondorioz eta goiz horretan bertan jasotako gonbiteak eraman ninduten Getxora larunbat iluntzean.

Bi ordu eta erdiko ikuskizuna izan zen eta ia goraino zegoen aretoa. Parte hartzaileei dagokionez, gehienak ezezagunak ziren niretzat eta horretxegatik oso sorpresa atseginak jaso nituen emanaldiaren zehar eta horrek dira nabarmenduko ditudanak.

Alde batetik, Mirari Azkune eta Aitziber Otegiren saioa bereziki gustatu zitzaidan eta asko poztu ninduen jakiteak Mirari bizkaitarra dugula, bertan ere harrobi ederra dagoenaren seinalea da eta. Errepertorio bariatua eskaini zuten eta argi utzi zuten badaukatela eskarmentua erromerietan.

Mirari Azkune

Euskaldun bikotearen ondoren, beste bikote harrigarri bat taularatu zen, Blai Casals eta Manu Sabaté kataluniarrak hain zuzen ere. Kanta tradizionalak jo zituzten baina oso kutsu modernoarekin. Hori gutxi ez balitz, Blai trikitixa jotzen zuen bitartean bonboa eta txastona ere jotzen aritu zen. Bertara hurbildu ginen gehienok txundituta geratu ginen gazte honen abileziaz, ez baitzituen erritmo sinpleak jotzen eta arras zaila izan behar delako dena uztartzea.

Blai Casals

Azkenik, atzerritik etorritako beste talde biak azpimarratu nahiko nituzke, soinujoleak onak baziren ondoan zituzten gitarra-joleak paregabeak zirelako. Italiarrak energikoagoak ziren eta nahiz eta intentsitatea etengabe aldatu, indar asko transmititzen zuten. Bretainiarrak aldiz, berezko duten aire zelta hori jariotzen zuten eta atmosfera gehiago sortzen zuten. Gadalzen taldea gogora ekarri zidaten behin baino gehiagotan, biak frantsesak eta estilo antzekoa izanik parekotasun asko dituztelako.

Irosima taldeko gitarra-jolea

Orokorrean oso saio heterogeneoa izan zen, aurretik aipatu ez ditudan Kupelak proposatu zuen saio martxoso eta Xabi Aburruzagak aurkeztutako ikuspegi garaikidearekin osatu zena. Ahaztu gabe, Mikel Martinez eta Patxo Telleria aktoreek burutu zuten aurkezpen aproposa bezain dibertigarria.

Parte hartzaileak ekitaldiaren bukaeran

Esker bereziak Miren eta Harkaitzi; konpainia hobeagorik topatzea zaila baita

"Geure Kolkotik" 2010

2010-11-03T11:36:00.004+01:00

Aurretiaz komentatutako lan bat kaleratu berri da eta salgai dugu jada dendetan, pieza berrien "Geure Kolkotik" diskoa alegia. Trikitixa Elkarteko bazkideok etxean jasotzen hasi gara, beraz bazkide zaretenok ez ezazue erosi laster jasoko duzue eta. Bestela, erosi nahi izan ezkero, Elkarren eskatu dezakezue besteak beste.

Lan honetarako bost trikitilarik hiruna kanta sortu dituzte eta perkusioak baino ez ditu laguntzen. Hauek dira diskoan parte hartu duten soinujoleak: Kristina Solano, Edurne Iturbe, Maixa, Urtzi Enrikez eta Izer. 15 pieza dira beraz guztira eta kanta instrumentalak eta letradunak tartekatzen dira.

Lehendabiziko entzunaldi baten gustatu zait. Orain sakonago aztertu eta gozatu beharra daukat.

Badator "Herria"

2010-10-29T14:57:00.006+02:00

Azken bi urtetan bezala, azaroarekin batera Kepa Junkeraren lan berria dator. Kasu honetan "Herria" kaleratuko du bilbotarrak eta disko honekin trilogia bat itxi egingo du. 2008an "Etxea" eta 2009an "Kalea" aurkeztu ziren eta lan berri honek ere aurreko diskoetako ildoa jarraituko du. Beraz, euskal kanta tradizionalak munduko musikari eta kantariek bere egingo dituzte, bakoitzak dituen abileziak islatuz. Kasu honetan 23 pieza izango ditu albumak eta grabaketak munduko txoko ezberdinetan burutu dira, besteak beste: New York, Oakland, Berkley, Paris, Casablanca, Estambul, Atenas, Boise, San Francisco, Los Angeles eta Hawai.

"Herria" azaroaren 16an kaleratuko da Warner Music diskoetxe eta Hiri Records zigiluaren eskutik. Hona hemen diskoaren azala:

EGUNERAKETA: diskoa eskatu dezakezue jada iTunes-en bidez eta nahiz eta oraindik ezin den deskargatu, kanta bakoitzaren 30 segundu entzun ditzakezue idea bat egiteko. Gainera, abesti zerrenda ageri da eta ematen du benetan bertsio harrigarriak entzungo ditugula, besteak beste pieza hauena: Egun Da Santi Mamiña, Orioko Baleari edo Axuri Beltza.

HERRIA / iTunes

Laster informazio gehiago izango dugu. Bien bitartean, bertan dituzue grabaketa eta ekoizpen prozesuaren argazki batzuk:

Tapiaren "eta tira eta tunba" medioetan

2010-10-20T16:47:00.004+02:00

Joseba Tapia buru-belarri dabil bere disko berria aurkezten eta komunikabideetan ere aipatu da lan berri honen plazaratzea. Hamaika artikulu publikatu dira azken asteotan eta orain herriz herri ibiltzea da hurrengo zeregina. Gernika, Elgeta edo Hernani izan dira besteak beste lan honen aurkezpenaz gozatu duten lehendabiziko geltokiak, baina hurrengo hilabeteetan askoz ere aukera gehiago izango ditugu Joseba zuzenean ikusteko. Bat nabarmentzearren, azaroaren 12an gaueko 22:00etan Durangoko Plateruena Kafe Antzokian eskainiko duena. Agenda guztia kontsultatzeko, bere webgunera jo: www.josebatapia.com

Horra hor, EITB-n eman zuten zatitxoa:

EGUNERAKETA (12-7): EITB Kulturan emandako erreportajea:

"Nemesioren Trikitixa", barnetik

2010-10-19T22:34:00.004+02:00

Gaur ikasle batek, Ametsek alegia, "Nemesioren Trikitixa" liburuarekin etorri da klasera neroni erakusteko asmotan. Abagunea aprobetxatuz gainbegiradatxo bat bota diot liburuari eta egia esan asko harritu nau bertan irakurri dudanak, trikitixako edozein ikasle bere burua islatuta ikusi dezakeelako testuok irakurtzean. Oso ondo islatzen dira zelakoak diren hastapeneko momentuak eta gainera azalpen oso interesgarriak ere ematen dira. Hori gutxi ez balitz, Ametsek esan dit errez irakurtzen dela eta oso entretenigarria dela.

Ez dut nahi gehiagorik aurreratu nahi kontakizuna ez hondatzeko, baina jakin, liburuak trikitixako maisu baten eragin zuzena izan duela eta trikitilari honi eskaini diola lana Pako Aristik. Gehiago jakiteko, liburua irakurri beharko duzue... nik nire alea eskatu dut honezkero.

II. Oñatiko Trikitixa Jaialdia

2010-10-18T13:27:00.005+02:00

Lizargarate Trikitizale Elkarteak antolatutako jaialdia urriaren 30ean ospatuko da 16:30etatik aurrera Oñatiko Santa Ana antzokian. Aurtengo edizioan Primi Erostarbe panderojolea omenduko dute eta bertan parte hartzaile ugari egongo dira: Joseba Tapia eta Estanga anai-arrebak, Izer aita-semeak eta Alabier, Ospas eta Janire, Lajatarrak eta Oriatarrak, Landa aita-semeak eta noski, Oñatiko Musika Eskolakoak ere bai.

Jaialdia 19:30etararte luzatuko da eta ondoren afaria ere egongo da. Sarrerak 10 €-ren truke lortu ditzakezue Oñatiko Umerez eta Urbia tabernetan. Egunean bertan ere salgai izango dituzte antzokian.

Informazio gehiagorako, Lizargarate Trikitizale Elkarteak Facebook-en duen txokora abiatu zintezkete:

FACEBOOK / Lizargarate

IX. Nazioarteko Trikitixa Jaialdia

2010-10-08T23:50:00.004+02:00

Azken bederatzi urteetan bezala, Nazioarteko Trikitixa Jaialdia ate joka dugu eta aurten aldaketa garrantzitsu bat egongo da. Bizkaian ostiraletan egin ohi zen eta Gipuzkoan larunbatetan. Beno ba, aurten alderantziz izango da baina programa berdina izango dute saio biek.

Ostiralean, azaroak 5, Tolosako Leidor antzokian ospatuko da lehendabiziko emanaldia, gaueko 22:00etan. Hurrengo egunean, azaroak 6, Getxoko Andres Isasi Musika Eskolan izango da zita arratsaldeko 19:00etan. Ondoren Glass tabernara abiatuko dira parte hartzaileak bertan piezatxo batzuk jo eta giro lasaieagoan aritzeko.

Parte hartzaileak honakoak izango dira: Fillippo Gambetta eta Claudio De Angeli italiarrak, Imosima Bretainiatik, Blai Casals eta Manu Sabaté katalanak eta Euskal Herritik Mirari Azkune eta Aitziber Otegi, Kupela Taldea eta Xabi Aburruzaga eta Jose Urrejola arituko dira. Emanaldiko aurkezleak Mikel Martinez eta Patxo Telleria izango dira eta sarrerak salgai daude jada.

"Amuma Says No" taldea

2010-10-07T00:21:00.003+02:00

Eguerdian, udan Boisen egondako lagun batek bideo bat bidali dit eta horren bitartez ezagutu dut "Amuma Says No" erromeria talde berezi hau. Berezia esaten dut Boisen dutelako jatorria eta haien hitzetan, euskal musikaren bihotza eta arima erakusten dute gaur egungo Amerikan. Trikitixa oinarritzat harturik Estatu Batuetako hainbat estilo uztartzen dituzte, euskal errepertorioa eskainiz ematen dituzten hamaika saioetan.

Trikitilaria Dan Ansotegui da eta panderojolea Sean Uranga deitzen da. Hauetaz gain Jill Aldape kantaria, Dave Manion gitarrajolea, Rod Wray baxujolea, Micah Deffries gitarrajolea eta Spencer Basterrechea baterijolea osatzen dute taldea. Informazio gehiagorako edo multimedia edukiez gozatzeko, joan zaitezte haien webgunera:

www.amumasaysno.com

Egia esan mirestekoa da euskal diasporak egiten duen lana eta Euskal Herriarenganako duen maitasuna. Zenbat dugun ikasteko bertan bizi garenok... Horra hor kontzertu ezberdinetako zati pare bat:

Junkeraren asteburu pasa proposamena; Urdaibai

2010-10-05T00:10:00.003+02:00

Ikaragarria da azken urteotan Kepak komunikabideetan duen presentzia eta horren erakusle dugu hurrengo bideoa ere. Kasu honetan, ETB 2-ko "Aspaldiko" saiorako egindako asteburu pasa proposamena dakarkigu. Bertan, aurretiaz egin bezala, Urdaibaiko erreserba naturala erakusten digu eta besteak beste Atxerreko ikuspegiez mintzo da. Iazko udan hantxe izan nintzen herriko gazteekin eta zin degizuet Junkerak ez duela gezurrik esaten ikuspegi honen edertasunaren inguruan. Bestela, begira bertatik atera genuen argazkia:

Bideoa ere bertan ikus dezakezue:

"Nemesioren Trikitixa" liburua

2010-09-25T19:47:00.006+02:00

Udazkenarekin batera euskal liburu eta diskogintza martxan jartzen dira, hamaika produktu kaleratuz batez ere Durangora begira. Horien artean, deigarria iruditu zait Pako Aristik plazaratu berri duen liburua, "Nemesioren Trikitixa" izenburupean hain zuzen ere. Idazle paregabea da Pako eta argi ikusi genuen orain dela bi urte eskolara hitzaldi bat ematera etorri zenean, ikasleek ondo pasatu zutelako eta hori arras zaila da orokorrean gazteek duten irakurzaletasuna kontutan hartuz. Agian, nork daki, bere laguna den Mikel Markezen eragina izango zuen lan berri hau sortzeko, dakigun moduan Mikel trikitilariaz gain Trikitixa Elkarteko kide ere badelako.

Beno ba, liburua Elkar argitaletxearekin kaleratu du eta aurkezpena urriaren lehendabiziko astean izango da. 5-9 urte bitartekoei zuzendua dago eta salgai dago jada. Opari polita dudarik gabe adin horretako umeentzat, are gehiago trikitixa jotzen badute.

Soinu txikiak presentzia handia izango duela seguru, bestela begira zer dion sinopsiak:

Zergatik dio Nemesioren amak pertsonak diatonikoak garela?
Zergatik diote trikitixa ez dela Euskal Herrikoa?
Zergatik diote Olentzero ez dela existitzen?
Zergatik daude zientoka trikitixa armairuetan gordeta?
Kezka askori egin beharko dio aurre Nemesiok.

Ilustratzailea: Javi Kintana

"El Fuelle Del Infierno" erreportajea

2010-09-22T21:41:00.006+02:00

Atzo TVE 2 kanalean aspaldiko erreportaje bat eman zuten, "Creadores" saioaren barnean. Bertan Kepa Junkera izan zen hizpide baina trikitixaren inguruko hainbat datu ere ematen ziren.

Erreportajea 1998an grabatu zen Kepak "Bilbao 00:00h" diskoa aurkezten ari zeneko garaian. Gogorarazi disko hau Madrilgo "Resistencia" diskoetxearekin kaleratu zuela eta horrexegatik besteak beste, penintsulako medioetan izan zuen presentzia. Hala ere uste dut diskoaren arrakasta, lana bera dela, niretzat behintzat inoiz esku artean izan dudan diskorik onena dudarik gabe. Hori gutxi ez balitz zuzenean ikusi nuen lehendabiziko aldia, disko hau aurkezten zebilen eta gogoratzen dut txundituta irten nintzela emanalditik.

"Bilbao 00:00h" diskoaren aurkezpeneko kontzertu baten (1998)

Argazkia: badok.info

Saioa grabatu nuen eta hor duzue bi zatitan banatuta zuek ere ikusi ahal izateko nahi izan ezkero:

Tapiarena labetik ateratzeko prest

2010-09-07T15:09:00.006+02:00

Aurreko sarrera batzuetan komentatutako diskoa prest dago eta hurrengo egunetan kaleratuko da, esan bezala "Eta Tira Eta Tunba" izenburuaz. Aurkezpena irailaren 15ean izango da eta "Real Politik" aurreko diskoa bezala, bere zigilupean plazaratuko du. Aurrerapen kanta bat jarri du Josebak bere webgunean eta horretaz gain, parte-hartzaileak eta letrak ere kontsultatu ditzakegu bertan.

www.josebatapia.com

Eguneraketa: salgai dago jada diskoa eta Josebaren webgunean eskatu dezakezue.

Esne Beltzaren arrakasta

2010-09-07T14:11:00.008+02:00

Diskoaren balorazioa egin nuenean, susmoa izan nuen benetako arrakasta "Noa" diskoarekin helduko zitzaiela eta hala izan da.

Horren adierazgarria izan da besteak beste Lezamako jaietan ikusi duguna. Iaz "Made in Euskal Herria" diskoa aurkezten etorri ziren eta bildu zen jendea eta batez ere ikusmina ez dauka alderik aurtengoarekin. Aurreko asteburuan jendetza ikaragarria bildu zen txosnagunean eta espektakulo itzela eskaini zuten Solano eta bere kideek, bertaratu zirenak guztiz harrituz. Horren lekuko dira ondorengo argazkiak:

Argazkiak: www.guillermourkijo.com

"Boom" honen ondorioz, 60 kontzertu inguru sinatu dituzte biran eta Japonia edo Alemania ere bisitatuko dute besteak beste. Seguruenik kontzertu guzti honen artean berezienetariko bat Aste Nagusian eskaini zutena izango da, aparteko muntaia izan zelako eta gainera karga emozionala ere bazuelako. Hor duzue kontzertuko irudi bat, egon zen giro paregabea ikus dezazuen:

Argazkia: Baga-Biga

Ea bidean aurrera egiten duten eta hurrengo urteetan lan berriak kaleratzen dituzten, trikitixarentzako osasungarria baita horrelako proposamenek arrakasta izatea.

Korrontzi disko berria prestatzen dabil

2010-09-07T13:55:00.005+02:00

Udazkenean disko asko kaleratzen dira, gehienak Durangoko Azokara zuzenduak eta Korrontzi ere lan berria prestatzen dabil. Blog honen izenburu bera izango du, "Infernuko Hauspoa" alegia eta Oinkari Dantza taldearekin batera lantzen ari diren proiektua bilduko dute CD eta DVDan.

Bertan, musikaz gain, koreografiak ere ikusiko ahalko ditugu aukerarako sortu dituzten kanta berriekin. Laster informazio gehiago izango dugu eta bertan irakurri ahalko duzue.

Faborez 04

2010-08-31T22:33:00.007+02:00

Faborez bildumaren laugarren alea kaleratu berri da eta aurkezpen erromeria irailaren 12an burutuko da Bergarako San Martin plazan, arratsaldeko 18:00etan.

Diskoan honako bikoteek parte hartu dute: Ansorregi eta Larrañaga, Lutxurdio eta Aitziber, Patxi Aiorga eta Joseba Zabalo eta Ander eta Aintzane Agirrebeña. Aurreko lanen ildoa jarraitzen du lanak eta bertan ere pieza tradizionalak entzuteko aukera izango dugu beraz. Salgai dago jada, besteak beste Elkar-en webgunean.

Iturria: Euskal Herriko Trikitixa Elkartea

LEZAMAKO JAIAK 2010

2010-08-31T14:40:00.008+02:00

Publizitate sarreratxoa da honakoa, herriko jaien berri emateko alegia. Baina ez pentsa trikitixarekin zerikusirik ez dutenik, ia egunero soinua entzuteko aukera izango dugulako. Herriko trikitilari eta orokorren musikariez gain, Koldo Etxeberria ere etorriko zaigu pare bat egunetan saltsa apur bat jartzeko asmotan. Beraz noiznahi trikiti hotsak entzun ahalko dira herriko kale eta tabernetatik.

Horretaz gain irailaren 3an, ostirala, bi talde lokalen ostean Trikiziorekin erromeria izango dugu Xabier Arakama soinujolearen gidaritzapean. Irailaren 4ean aldiz, Betagarriren ostean Esne Beltza datorkigu Xabi Solano buru dutela eta ondoren Triki Ta Ke Iker Dorronsororekin.

Bertan uzten dizuet ekitaldi nabarmenenak laburbiltzen dituen kartela eta baita programa osoa ere. Ongi etorriak zarete eta gure herrian!

Bertan elkar ikusiko dugulakoan...

PROGRAMA OSOA

Junkera eta Euskadiko Orkestra Sinfonikoa ETB 1en

2010-08-25T13:46:00.006+02:00

Aurreko sarrera baten Kepa Junkerak eta Euskadiko Orkestra Sinfonikoak otsailean eskaini zuten kontzertuaren kronika argitaratu nuen eta bertan kontzertua ETBn emango zutela baieztatu nuen. Beno ba, emanaldia telebistan ikusteko aukera izango dugu larunbat honetan, abuzutuak 28, 22:00etan ETB 1en. Gogorarazi emanaldia bi saiotan banatu egin zela, lehendabizikoan Keparen kanta ezagunak interpretatuz eta bigarrenean "Etxea"-ko abestiak jo zituztelarik.

Nik biziki disfrutatu nuen kontzertua eta ea orain ere telebistan ikusten gozatzen dudan.

Kontzertuko momentu bat

EGUNERAKETA: horra hor kontzertuko kanta pare bat. Besteak ikusteko abiatu zaitezte YouTubeko kanalera:

YOUTUBE - Hauspoa

30. Euskal Herriko Trikitilari Gazteen txapelketa

2010-08-22T02:38:00.005+02:00

Zeanurin ospatu zen abuztuaren 15ean Euskal Herriko Trikitilari Gazteen txapelketa eta aurtengoa 30. edizioa izan da. Gipuztar bikote batek irabazi zuen lehiaketa, Edurne Errandonea eta Ander Beldarrainek alegia. Bigarren, Ander bera eta Eneritz Aulestia geratu ziren, hirugarren Jone Uria eta Miren Gisasola eta laugarren, irudian ikusi ditzakezuen Aritz Landazabal eta Julene Otegi bizkaitarrek amaitu zuten.

Horra hor bizkaitar bikoteak jo zuen pieza bat:

Jo zituzten beste kantak ikusi eta entzun ahal izateko, jo hurrengo estekara:

SOINUTAPANDERO

Esker bereziak Julene Otegiri argazki eta informazioagatik

"Trikiliklik" irratsaioa Euskadi Irratian

2010-08-13T23:26:00.020+02:00

Euskadi Irratia eta Euskal Herriko Trikitixa Elkartearen arteko elkarlanaren fruitua da "Trikiliklik" irratsaioa. 10 atal izango dira eta larunbatetan ematen dituzte 15:00etatik 15:30etara. Bertan, Oihane Egurtzaren gidaritzapean hainbat testigantza eta pieza entzuteko aukera izango dugu, beti ere era oso dinamikoan. Jorratuko den gai nagusia trikitixak bere sorreratik izan duen bilakaera izango da.

Saio batzuk entzungai daude jada eta bertan dituzue. Ez dakit zehatz-mehatz noiz hasi ziren irratsaioarekin, baina momentuz bost atal daude EITBren webgunean eta saiatuko naiz hurrengoak ere bertan jartzen kaleratzen diren heinean.

- Soinu txikiak osatutako errepertorioa eta hedapena

- Euskal Herrira nola heldu zen

- Mauriziaren kantaera eta Elgetak maisu moduan egindakoa

- Panderoari buruz

- Erromeriak, gazteek erlazionatzeko zuten modua

- Soinu diatonikoa munduan barrena

- "Infernuko hauspoa" oroitzen

BERRIA: - Trikitixa, landagunetik hirira

BERRIA: - Hauspoaren aire berria

Oharra: ez bada erreprodukzio barra agertzen, egin klik eskumaldean agertzen den "mp3" estekan eta grabazioa zabalduko da.

Jatorrizko argazkia: Garazi Unzueta

"Beti Bizi" dokumentala EITB Kulturan

2010-08-12T23:31:00.006+02:00

Uztailaren 26an Busturiko Madariaga Dorretxean "Beti Bizi" proiektuaren inguruko dokumentala grabatu zen. Bertan, Xabier Amuriza eta Kepa Junkeraren testigantzak bildu zituzten eta horretaz gain, Kantika Koraleko parte hartzaileekin batera diskoko kanta batzuk interpretatu zituzten. Erreportaia, printzipioz, abuztuaren 17an ikusi ahalko dugu ETB 2n eta abuztuaren 19an ETB 1en, EITB Kultura saioan. Oraindik ordua ez dago konfirmatuta, baina jakin bezain pronto jarriko dut bertan.

Horra hor grabaketako irudi batzuk:

EGUNERAKETA / Horra hor EITB Kultura saioan eman zuten erreportajea:

"Beti Bizi" diskoaren balorazioa

2010-08-07T00:45:00.008+02:00

Urdaibaiko paduretan lore bitxi bat topa dezakegu, "beti bizi" izenaz ezagutzen dena. Kontutan izanik paduretako ezaugarri naturalak oso baldintzatzaileak direla, benetan harrigarria da horrelako landare bat bertan haztea. Hori da gida batek orain dela aste gutxi batzuk azaldu ziguna herriko gazteekin joan ginenean bertara eta lore honen ereduari jarraiki, ematen du disko honek ere trebetasun eta ausardia hori islatzen dituela. Beraz, izenburua behintzat, ezin aproposagoa.

Zaila iruditzen zait kopla tradizionalei zapore garaikide bat ematea, are gehiago hamaika bertsio kaleratu direnean honezkero. Hala ere, zin degizuet disko honek ikuspuntu zeharo berritzailea duela eta benetan iraultzailea izan daitekeela. 12 kantez osatua dago eta gehienak euskal dantzen melodiak dituzte ardatz, nahiz eta tarte oso libreak dauden inprobisazio eta aparteko moldaketentzako.

Xabier Amuriza dugu aitzindaria orain dela ia 10 urte Tapia eta Leturiak ateratako "Bizkaiko Kopla Zaharrak" diskoan bezala. Alabaina, ez nituzke lan bi hauek konparatuko ez litzatekeelako justua izango, perspektiba oso ezberdinez eginda daudelako. Jakin, proiektu berri honetan Amurizak kanta baten baino ez duela abesten, baina bere eragin etengabea atzeman dezakegula pieza guztietan. Menturatuko nuke bera ere harrituta geratu dela emaitzarekin eta duen ikuspegi zaharberritzailea kontutan hartuz, seguru pozik dagoela produktuarekin.

Kantika Koralaren inguruan, uste dut oso lan ona egin dutela eta ez nau batere harritu egia esan, kaleratu zuten "Kantika Sakra" diskoa entzun ondoren haien potentzialaz jabetu nintzelako. Zeregin horretan, Basilio Astúlezen lana nabarmendu beharko genuke lan ikaragarria egiten ari delako neska gazte hauekin eta gainera etekin handia lortuz. Koplak kantatzeaz gain, nik musika tresnen zerrendan ere sartuko nituzke, haiek eramaten dutelako kopla hauen melodia eta pisu guztia. Askotan kantatzen baitute base erritmiko edo akorde soil baten gainean, horrek suposatzen duen erronkarekin. Horretaz gain, behin baino gehiagotan Keparekin askotan parte hartu duten Bulgarka laukotea gogorarazi didate, polifonia orekatu eta bikaina sortuz.

Musikan zentratuz, txundigarria da nola uztartzen diren ordenagailuz egindako programazioak musika tresna akustikoekin. Oso konpilazio lan fina egin behar izan dute dena osotasun koherente baten biltzeko, zaila izaten delako hamaika efektu eta hamaika nota ondo uztartzea. Presentzia berezia dute programazio eta pianoak, biak Jose Luis Canalen eskutik eta txalapartak, bai egurrezkoak eta baita harrizkoak ere. Trikitixa entzuteko aukera ere badugu, baina ez dauka aparteko pisua kantetan eta gehienetan bigarren maila baten gelditzen da. Junkerak ez du nahi izan trikitixa protagonista bilakatzea eta horrexegatik soinu txikiaz gain, moldaketa eta perkusioez ere arduratu da diskoa ikusmira zabal eta pluralago batez hornitzeko.

Osotasunean entzunda, oso lan apurtzailea izan daitekeela uste dut, agian inflexio puntu bat markatuko duena etorkizunean soinu txikiak jarraituko duen bidean. Neuk behintzat euskal musika munduan gauza antzeko gutxi entzun ditut, agian Tomas San Miguelen zerbait, baina ñabardura txikiak baino ez. Nahiz eta musika elektronikoak garrantzia handia izan, ez nuke Bunpada Sound edo Gose bezalako taldeekin konparatuko, erabat ezberdinak direlako estiloak. Kanta batzuetan ordea Mike Oldfielden kantaren bat ekarri didate gogora, Tubular Bells-en bat barne. Alabaina kutsu asko identifikatu daitezke entzulearen arabera eta horren adierazgarri, lagun batek "Chill Out" disko bat ote zen galdetu didala zati bat entzun ondoren. Baina beno, ikusiko dugu jendeak horrelako lan baten aurrean nola erantzuten duen eta horren arabera diot nik gehiago edo gutxiago ustiatuko dela bide berri hau.

Laburbilduz, uste dut Keparen lanik berritzaileena dela 2006an "Hiri" atera zuenetik. Ordutik euskal kanten bilduma eta "Sessions" disko biak atera dituelako, zeinetan beste erregistro minimalistagoetan aritu den. Azaroan "Herria" kaleratzearekin batera amaiera emango dio kanta tradizionalen trilogia horri eta ondoren etorriko diren lanen hastapen puntua "Beti Bizi" hau izan daitekeela pentsatzen dut. Ikusiko dugu hurrengo hilabeteetan zerekin datorkigun...

Diskoa Elkarren webgunean eskatu dezakezue, denda askotara ez delako oraindik heldu. Bien bitartean, ea entzuteko aukera duzuen eta gogorarazten dizuet bertan ere zuen iruzkina idatzi dezakezuela zuen aburuekin.

Kantika, Amuriza eta Junkera / Madariaga Dorretxean (Busturia)

Sartzear da jaia Portura

2010-08-06T14:20:00.007+02:00

Abuztuaren erdialdean Portugaleteko jaiak ospatuko dira eta egun berberean aparteko bi trikitilarien kontzertuez gozatzeko aukera izango dugu. Abuztuaren 17an, Paseo de la Canillan Xabi Aburruzaga eta Kepa Junkera arituko direlako. Xabiren saioa 20:30etan hasiko da eta Keparena 22:30etan. Beraz, aukera ona arrastipasa Portun egin eta bide batez bi emanaldi eder hauetaz disfrutatzeko.

Horretaz gain, Aburruzagak Portugaleteko kuadrilen kanta sortu du eta entzungai duzue honako estekan:

SARTU DA JAIA PORTURA kanta

Diskoaren atzekaldea

Azken Nazioarteko Trikitixa Jaialdia ETB 1en

2010-07-20T00:28:00.006+02:00

Asteburu honetan ETB 1en aurreko azaroan ospatu zen IX. Nazioarteko Trikitixa Jaialdia emango dute, uztailaren 25ean gaueko 23:50etan hain zuzen ere. Beste urte batzuetan larunbatetan eta goizago ematen zuten, baina beno, erdi oporretan egonik ikusteko aukera izango dugu gehienok. Hori bai, ia ordu biak arte egon beharko dugu telebista aurrean. Goza dezazuela.

"Noa" esku artean

2010-07-05T00:04:00.005+02:00

Astetxo batzuk daramatzat Esne Beltzaren azkena entzuten eta aitortu beharra daukat, "Made in Euskal Herria" lehendabiziko lana baino gehiago gustatzen zaidala azken hau. Aurreko diskoa ere ondo dago baina honetan azken urteotan jasotako esperientziak jasotzen dituzte eta gehiago asetzen nau. Gainera kanta batzuk hainbeste gustatzen zaidan Etzakiten zaporea dute eta nik behintzat eskertzen dut. Hala ere badaude estilo eta moldaketa oso originalak, country kutsukoak esaterako.

Hamazazpi kantaz osatuta dago diskoa eta dantzagarria da guztiz. Hiruzpalau nabarmentzekotan: Nafar Erreinua, Hona Bostekoa, Hankatxuak eta Gogoak. Oso ezberdinak dira elkarren artean, bai gai eta baita estiloz ere eta hor dago disko honen aberastasuna. Hamaika hizkuntza, hamaika musika-tresna, hamaika gai,... disko heterogeneoa oso.

Diskoak arrakasta handia izaten ari duela ematen du, besteak beste, Esne Beltzak gazteek eskatzen dutena eskaintzen duelako. Asmatu egin baitute euskal gazteriaren gehiengoak haien MP4 eta parrandetan entzun nahi dutenarekin. Horren ondorioz, gure kasuan, zer hoberik ez dago trikitixa osasuntsu mantentzeko.

Irailaren 4ean Lezaman joko dute Betagarri eta Triki ta Ke taldeekin batera 23:00etatik aurrera eta gonbidatuta zaudete nire herrira hurbildu eta aparteko giroaz gozatzeko. Bien bitartean, hor duzue sortu duten 2010eko Kilometroaren kanta, diskoan ere sartu dutena:

"Beti Bizi", Junkeraren aparteko proiektua

2010-06-26T16:02:00.008+02:00

Aspalditik prestatuta zeukaten lana aurkezteko momentua heldu da eta astelehen honetan, ekainak 28, estreinatuko dute Bizkaiko kopla zaharren ikuspuntu berria eskainiko duen "Beti bizi" albuma. Xabier Amuriza, Leioako Kantika Korala eta Kepa Junkeraren arteko elkarlanaren fruitua da eta Kepa bera izan da ekoizpenaren arduraduna. 12 kantaz osaturik dago eta abesbatza, tradizioa eta musika elektronikoa uztartu dituztela esaten dute arduradunek. Grabazioa Bilboko Balea estudioetan burutu zen eta Hiri Records diskoetxeak argitaratuko du.

Urte batzuk dira proiektu hau eraikitzen hasi zirenetik eta iazko abuztuan gehiena grabatuta zeukaten, baina Keparen beste lanen aurkezpenek eta kanpoan bizitzen egon dela kontutan hartuz, atzeratu behar izan zuten diskoaren kaleratzea. Alabaina, heldu zaio garaia.

Datu gehiago hurrengo egunetan izango ditugu, baina bien bitartean bideoklip bat ikusi dezakezue "Aita San Migel" kanta eta Santi Yaniz argazkilariaren irudiak uztartzen dituena:

Eguneraketa. Hauexek dira diskoko 12 kantak:

1. AITA SAN MIGEL

2. IPIÑABURU LEKU ALTUAN

3. AITITE MERKURIO

4. ZOZOA KANTETAN

5. HORRA GOIKO LANDETAN

6. AIKO JUANIKO OLABARRIKO

7. ANTONIO GOITIA

8. MATXALEN BUSTURIKO

9. KANTETAN BIHER DOT HASI

10. TRIKITI TXAINIA

11. SOLDADU NOA SOLDADU

12. GAZTAINA KOLOREKO

Trikitilari gazte bat joan zaigu

2010-06-25T13:47:00.011+02:00

_

Zer esanik gabe geratzen gara horrelako albiste bat jasotzean, pertsona nagusien heriotzek bizitaren legea jarraitzen dutelako, baina gazte bat bapatean doanean argi dago ez dela justua.

Atzo istripu baten ondorioz Irantzu Antxustegi, 22 urteko trikitilari markinarra zendu zen Berrizko San Juan festetan jo ostean etxerantza zihoanean. Neska parte hartzailea zela esaten dute ingurukoek, trikitilari txapelketa eta hamaika ospakizunetan parte hartzen zuena.

Horrelakoetan hala ere, hitzak soberan daude. Doluminak familia eta bere ingurukoentzat.

Irantzu Antxustegi, Goian bego.

Ikasturte amaierako gogoetatxoa

2010-06-16T01:26:00.011+02:00

Ekainaren erdialdean, urtero bezala, ikasturtea agurtzen hasten gara. Honezkero hamaika emanaldi eskaini ditugu eta azken batzuk baino ez zaizkigu falta pertsiana jaisteko. Suposatzen dut trikitixa eskola gehienetan antzera zabiltzatela asteotan; azken orduko entsaioak, ikasle eta irakasleen nerbioak, gurasoekin batzarrak, informeak, klaustroak, merendolak,... Ni behintzat hala nabil, baina ez naiz kexatzen ikasle paregabeak ditudalako eta horrek asko laguntzen duelako arratsaldero trikitixak kotxean sartu eta klaseak ematera goazenean. Etxean lan gehiago egingo balute, itzel! Hala ere, biba zuek!

Etenaldi hau aprobetxatu nahiko nuke azken kurtso honetan blogetik pasatu zaraten guztioi eskerrik beroenak emateko, geroz eta bisitari/jarraitzaile gehiago zaretelako, batzuk oso finak eta askok zuen esker onak helarazi dizkidazuenak. Aurten gainera, Facebook eta Tuentian ere lehiotxoa du blogak eta honen bidez publiko zabalago batera heldu garela uste dut. Bide batez, barkamenak eskatzea ere gustatuko litzaidake inoiz norbait kaltetu izan badut, informazioren bat gaizki egon bada eta baita behin baino gehiagotan egindako hankasartze ortografiko eta gramatikalengatik ere. Geroz eta ekarpen gehiago egiten dituzuen arren, neuk bakarrik kudeatzen dut txoko hau eta nahiz eta ondo egiten saiatzen naizen, inperfektua naiz zorionez.

Irakasle eta batez ere ikasleen desira nagusia betetzear dago, oporraldia badator eta. Baina uda ez da alferrik galduko, orain hasten direlako herri gehienetako festak eta trikitixak badu zer esana hauetan. Beraz, ikasturtean zehar ikasitakoa kalean erakusteko garaia heldu zaigu udazkena heldu bitartean.

Ea hortik zehar topo egiten dugun piezatxo batzuk elkarrekin jotzeko eta hala ez bada, ondo ibili eta zaindu...

Argazkia: "Herria" diskorako irudiak / Egilea: Marie-José Durquet

Aburruzaga Ortigueira jaialdirako hautagai

2010-06-12T13:30:00.008+02:00

Xabi Aburruzaga trikitilaria Ortigueirako jaialdiak antolatzen duen Runas Proiektuaren hautagai zerrendan dago eta finalera heltzeko botoa eman diezaiokegu jada. Proiektu hau jaialdiko antolatzaileek talde hasiberrientzat abian jarri zuten egitasmoa da eta helburu nagusia, talde hauek ezagutzera ematea da.

Portugaletetarra "Denboraren Naufrago" lanarekin aurkeztu da eta izenburu bereko kanta da hautatu dutena botoak biltzeko. Webgunean egingo den hautaketaz gain, epaimahai profesional batek aukeratuko ditu hiru finalistak. Berauek kontzertu bat eskainiko dute uztailaren erdialdean eta irabazleak hurrengo urteko jaialdian emanaldi bat eskainiko du.

Botoak ekainaren 16rarte eman daitezke honako webgunean:

ORTIGUEIRA JAIALDIA - Runas Proiektua

Eguneraketa: boto nahikoak lortu zituen kontzertua emateko eta azkenean bigarren gelditu zen Xabi. Horra hor kontzertuko kanta bat:

Kepa Junkeraren webgune berria

2010-06-09T21:50:00.007+02:00

Gauerdian estreinatuko dute Kepa Junkeraren webgune berria, zeinetan hamaika kontu aurkituko dituzuen. Hilabete asko eman dituzte diseinu eta programazio lanetan eta argitaratzeko momentua heldu da jada. Nik orain dela hilabete batzuk ikusi nuen beta bertsioa eta oso ondo zegoela aitortu beharra daukat. Hainbat elementu oso originalak ziren, besteak beste, aldatu ez badute diskografia atalean diskoak nola ordenatuta zeuden asko gustatu zitzaidan eta hori egiteko ordu bat baino gehiago eskaini zituztela argi dago. Horretaz gain kanta asko daude entzungai eta orain arte kaleratu ez den informazioa ere irakurgai dago. Gainera webgune osoak adostutako diseinua dauka eta zin dagizuet asko, literalki eskuz eginda dagoela. Bihartik aurrera sartu eta zuen ondorioak atera.

www.kepajunkera.com

Literaturia: "eta tira eta tunba" eta harrobia

2010-06-05T16:23:00.013+02:00

Bart, lagun onez inguratuta, Joseba Tapiaren lan berriaren aurkezpen kontzertua ikusteko aukera izan nuen, Larrabetzun antolatu duten Literaturia egitasmoaren barruan kokatzen zena. Saioa 22:30ak aldera hasi zen Anguleri Kultur Etxearen parean eta egia esan asko harritu gintuen lekuak. Argazkietan ikus dezakezuen moduan, xarma duen txokoa dela dudarik ez.

Iguripena handia zen "eta tira eta tunba" lan berri honen inguruan, ordura arte ezer entzuteko aukerarik izan ez genuelako eta Joseba musikari originala eta ausarta izanik seguru ondo antolatutako saioa eskainiko zuela. 5 musikariz inguratuta (tronpeta, saxoa, tronboia, tuba eta bateria jotzaileak) agertu zen eta diskoaren gaineko azalpen batzuk eman ondoren, emanaldiari hasiera eman zioten.

Bere bakarkako aurreko lanekin aldaratu ezkero, antzekoena "Agur Intxorta Maite" izango litzateke batez ere historiako garai zehatz bateko koplak eta kantak biltzen dituelako, karlista eta liberalen sasoian kasu honetan. Hala ere, entzun nuena kontutan hartuz, musikalki ez dauka azken horren antza askorik. Oraingoan haizezko musika tresnak aukeratu dituelako eta jazzbana-ren kutsua handiagoa delako "Intxorta"ren biluztasuna baino. Hala ere ez da edozelako jazzbana, musikariak oso onak direlako eta aditu baten ustetan perkusioan zegoena primerakoa delako. Pena bakarra trikitixa oso gutxi entzuten zela, Tapiak berak hala nahi zuelako edo teknikariak horrela hobetsi zuelako, nork daki.

Hiruzpalau kanta asko gustatu zitzaizkidan. Bat nabarmentzekotan azkenean jo zuten biribilketa izango litzateke, zeinekin eszenatokitik jaitsi eta tabernara abiatu ziren txaranga baten antzera bertan saioari amaiera emateko. Beste kantak, lasaiago entzun beharko ditut diskoa esku artean izanik, lan honetan oso garrantzitsuak izango direlako liburutxoan etorriko diren azalpenak koplak eta garai hartako pasadizoak ondo ulertzeko.

Hurrengo estekan dituzue bideotxo batzuk eta baita argazkiren bat gehiago ere zuen ondorio propioak atera ahal izateko:

FLICKR - larrabetzutik.org

Ekitaldiko momentu bat

Entsaiatzen / Argazkia: larrabetzu.org

Angulerin prestatu zuten txoko ederrean

Bukaeran, txaranga tabernara bidean / Argazkia: larrabetzu.org

Alabaina, Tapia ez da egunotan Larrabetzutik pasatuko den soinujole bakarra, gaur gauen Gose taldeko Ines eta taldekideak entzuteko aukera izango dugulako eta hori baino lehen herriko trikitilari gazteak ere irten direlako kalejiran. Bigarren ikasturtea dugu Larrabetzun trikitixa eskolak ematen eta jadanik fruituak batzen hasi gara nahiz eta oraindik emanaldi xumeak egin behar izan. Hala ere, giroa primerakoa izan da eta jotzeaz gain, kantatu, dantzatu eta bero ikaragarria ere pasatu dugulako, kar kar kar. Hurrengo baten gehiago eta seguru hobeto.

Emanaldia hasi baino lehen dena preparatzen / Argazkia: larrabetzu.org

Abiapuntua / Argazkia: larrabetzu.org

Larrabetzuko kale nagusian pieza bat jotzen / Argazkia: larrabetzu.org

Gozategi "Bizi-bizirik" dator

2010-06-03T21:17:00.005+02:00

15 urte dira jada lehendabiziko lana kaleratu zutenetik eta seigarren diskoa plazaratuko dute hurrengo egunetan oriotarrek "Bizi-bizirik" izenburupean. Oraingoan, estudioz aldatu eta Bilboko Balea estudiora abiatu dira haien ustez etapa berri baten hasiera markatzen duen lana grabatzera. Bertan Asier Erzilla izan dute teknikari lanetan eta David Nanclares aldiz ekoizpen lanetan, Asier Gozategirekin batera.

Informazio gehiago nahi baduzue Asier Gozategiri egindako elkarrizketa sakon eta interesgarri bat duzue irakurgai Karkara aldizkarian. Balea estudiokoek aurrerapen bideotxo bat ere argitaratu dute grabaketako irudi eta diskoko kanta batekin:

Tapiaren "eta tira eta tunba" disko berriaren aurkezpena

2010-06-03T18:18:00.005+02:00

Bihar, ekainak 4, Larrabetzuko plazan aurkeztuko du Tapiak bere lan berria, "eta tira eta tunba" izenburupean irailean argitaratuko dena. Kontzertua 22:00etan hasiko da eta Larrabetzun asteburu honetarako antolatu duten Literaturia egitasmoaren barnean kokatzen da emanaldia. Egun guztietan hainbat ekintzaz gozatzeko aukera izango dugu eta besteak beste, eskolako umeek ere trikitixa joko dute nire laguntzaz larunbat eguerdian. Horretaz gain, haurren antzezlanak, mahainguruak, liburu azoka, kontzertuak (Gosek zapatuan joko du, 22:30etan HORI BAIen), liburu aurkezpenak, etab. antolatu dituzte bertara hurbilduko diren guztientzako.

Handik ikusiko garelakoan, bertan uzten dizuet informazio gehiagorako webgunea:

www.larrabetzu.org/literaturia

"Ilunerean" taldearen webgunea martxan

2010-05-26T23:23:00.007+02:00

Euskal Herriko eta penintsulako hamaika txokotan jo duen talde bizkaitarra da Ilunerean. Haien proiektuaren berri emateko webgunea estreinatu berri dute eta eduki interesgarri asko topa ditzakegu bertan, besteak beste: argazkiak, kantak, bideoak, proiektuaren nondik norakoak, helburuak edo testu literarioak. Baita haiekin harremanetan jartzeko bideak ere, noski.

Ekintza ezberdinak burutzen dituzte eta adibidez kalejira, ikus-entzunaldi, koktel edota ikastaroetan ikus ditzakegu hara eta hona. Gainera, Urpe kirolariarekin batera musika eta herri kirolak uztartzen dituzten emanaldiak ere eskaintzen dituzte nahi izan ezkero. Taldea honako hiru musikarik osatzen dute: Alex Garcia (trikitixa, panderoa, ahotsa), Fede De Dios (alboka, bizkaitar dultzinea, saxo sopranoa) eta Iker Diez (txalaparta, alboka, perkusioak). Hirurak esperientzia luzea dute irakaskuntzan, euskal musikaren munduan eta hori gutxi ez balitz, maila pertsonalean ere paregabeak dira, huts egiten ez duten horietakoak.

Herri musika da haien ardatza nahiz eta errepertorio tradizionalaz gain, berrikuntza ugari eransten dituzten haien saioetan. Honen harira, zin dagizuet hainbat kanta eta moldaketa ikaragarriak direla, inoiz entzun gabekoak. Horretaz gain giroa berehala berotu egiten dute eta ez da batere zaila haiekin kantuan, jotzen edo dantzan amaitzea. Webguneko aurkezpen orrian ondo adierazten dute taldearen filosofia:

"Ilunerean argire, zerurean belarrire, usadio zaharrak segidu, herri musika barrire"

Pasa zaitezte webgunetik, gauza asko dago ikergai eta!

www.ilunerean.com

Argazkiak: Ilunerean

"Sokaide" taldearen diskoa esku artean

2010-05-26T13:26:00.008+02:00

Egun batzuk daramatzat Sokaide taldearen estreineko lana entzuten eta noizbehinka egiten dudan moduan, baloraziotxo bat egitea pentsatu dut.

Alde batetik, diseinuari dagokionez, lan koherentea eta landua dela ikusten da. Bai azala eta baita liburuxka ere ondo lotuak daudelako eta koloreak, letra-motak, etab. asko zaindu dituztelako. Gainera, Saioa Cabañasen (Gauilunak) argazki batzuk ere sartu dituzte liburuxka janzteko asmotan. Guzti honek badu bere garrantzia, entzulea diskoa Internetetik jaitsi edo dendan erosteko aukeraketa egiterakoan kontutan hartzen baititu horrelakoak. Honen harira, ondo egongo litzateke musikari askok egiten duten bezala, aparteko edukiak sartzea (making of,-a bideoklipa, argazkiak, partiturak, aparteko testuak,...). Alabaina ezin zaio baina bat ere ez jarri lanaren aurkezpenari.

Bestetik, diskoa 10 kantaz osaturik dago, batzuk instrumentalak, besteak letradunak eta trikitixa da nagusi kanta gehienetan. Hala ere biolina, alboka, txalaparta, gitarra edota albokote berriek ere badute bere espazioa hainbat kantetan. Estiloari dagokionez, ez dut uste ezer berririk asmatu dutenik, baina molde ezberdinak uztartu dituzte eta horrexegatik ez du ematen lehenago entzundakoaren sentsaziorik. Hala ere kanta askok badute aurretiaz entzun ditugun hainbat talderen kutsua, besteak beste: Korrontzi, Kukuma, Alaitz eta Maider (batez ere Inshala diskoa), Kepa Junkera, O+hatz Proiektua edo Seiren. Nahiz eta "Ortozik" aurretik aipatutako taldeen lanak baino pop-eroagoa dela iruditzen zaidan, erromeriarako egokiagoa agian.

Laburbilduz, diskoa gozagarria da eta eskertzen da horrelako lanak argitaratzen dituzten taldeen esfortzua eta borondatea. Albuma salgai dago jada eta Elkarren esaterako topa dezakezue. Horra hor aurkezpen kontzertuko irudi batzuk:

Argazkiak: Saioa Cabañas

Kupelaren "Arriskua Maite" salgai jada

2010-05-25T01:25:00.006+02:00

Aurreko sarreran komentatu bezala, Kupela taldea hirugarren diskoa prestatzen jardun da eta uste baino lehenago kaleratu egin dute, jadanik salgai dagoelako. Diskoak 14 kanta ditu eta ohitura den legez, fandangoak, arin-arinak, rantxerak, etab. entzun ditzakegu bilduman. Gainera, apur bat entzuteko aukera izan dut eta aurreko diskoetako estiloa mantentzen dutela argi dago. Erreseina ofizialak zera dio:

"Erromeriaren erregeak berriro ekinean!
Gau Giro eta Pagotxa aurreko lanen arrakastaren ondoren, Larrañagak (panderoa, ahotsa), Zabalek (trikitixa) eta Berastegik (bateria-perkusioa), Arriskua maite diskoa aurkezten digute. Aurrekoetan bezala, bertsoa, trikitixa eta euskal senik zuzenena eta freskoena, umorez eta satiraz tindaturik ekarriko dizkigute kantu berrietan. "

Elkarren eskatu dezakezue jada edo bestela iTunes-en ere erosi ahalko duzue ostegunetik aurrera. Hala ere, harrigarria den arren, Interneten asteburuan eskegi dute edonork jaisteko. Kontutan hartuta aurkezpena ostegun honetan egingo dela eta medio digitaletan egun horretara arte ezingo dela erosi, uste dut diskoetxeek zerbait aldatu beharko luketela diskoak argitaratzeko garaian. Alabaina, nahiz eta gai hau aspertu arte jorratu den, norberaren erabakia izaten jarraitzen du erostea edo deskargatzea.

Iturria: Elkar

ALTZAPORRU - 2010eko Maiatza

2010-05-19T23:05:00.008+02:00

Altzaporru buletineko azken alean hurrengo hilabeteetan kaleratuko diren hainbat lanen berri ematen da besteak beste. Alde batetik, Faborez 04 diskoa udazkenerako kalean izango da eta honako bikoteek parte hartuko dute: Patxi Aiorga eta Joseba Zallo, Ander eta Aintzane Agirrebeña, Ion Ansorregi eta Andoni Larrañaga eta Lutxurdio eta Aitziber Otegi. Bestetik, Kupela taldeak hirugarren lana prestatzen dabil, aurreko diskoetako musikari eta ildoan, freskoa eta umoretsua alegia. Zabaleren soinua, Larrañagaren panderoa eta Berastegiren bateria barne hartuko dituen bilduma "Arriskua Maite" izenburupean kaleratuko da. Azkenik, Joseba Tapiak bakarkako lan berria prestatzen dihardu eta kasu honetan, karlisten eta liberalen arteko liskarretan oinarritu da aurretik "Agur Intxorta Maite" diskoan egin zuen bezalaxe historiako garai zehatz baten zentratuz. Soinu ezberdin bat lortzeko asmotan, haizezko musika tresnak izango ditu lasartearrak lagun eta udazkenean plazaratuko da lan monografiko hau. Orduraino itxaron beharko...

Bestetik, maiatzaren 29an ospatuko den Gertariko Trikitilari Gazteen Txapelketaren informazioa ere badakar buletinak. Honen inguruko informazio gehiago jasotzeko: ttiki.com/13487

Albiste gehiago ere badakartza, baina guztiak irakurtzeko bazkide egin eta etxean jasoko duzu aldarteka.

Iturriak: Euskal Herriko Trikitixa Elkartea / badok.info
_

iPad-aren erabilpen musikala

2010-05-15T22:06:00.010+02:00

Software gomendioen osagarri bezala, oraingoan etorkizuneko teknologia iraultzatuko duen "gadget" bat dakarkizuet.

Orain dela hiru aste pasatxo jaso neban iPad-a eta orduztik bere ezaugarriak aztertzen aritu izan naiz. Kaleratu berria denez oraindik ez dago aplikazio espezifiko askorik, baina hala ere bere potentziala ikusi dezakegu jada. Sarrera honetan, erabilpen musikalean zentratuko naiz blog honen ardatzera egokituz.

Ohiko aukerez gain (iPod, iTunes, YouTube,...), hainbat berrikuntza dakartza aparatu honek. Alde batetik, iPhone eta iPod Touch-eko aplikazio guztiak erabili ditzakegu, besteak beste gitarra afinatu, pianoko akordeak bilatu edota metronomo bezala erabiltzeko. Alabaina aplikazio hauek ez dute iPad-aren benetako potentzia aprobetxatzen eta horrexegatik, "app" espezifikoak kaleratzen hasi dira. Horien artean batzuk oso interesgarriak dira. "Magic Piano" adibidez, pianoa jotzeko eta digitazioa lantzeko programa ikaragarria da eta "Accordion" akordeoi bat simulatzen du guk atzamarrez jo ahal izateko. Bateria, gitarra, etab. instrumentu ere jo ditzakegu ia 10 hazbete dituen ukimenezko pantailaren bidez. Horretaz gain, badaude mundu profesionalera zuzendutako aplikazioak, musika estudioetan hainbat lan sistematizatzeko esaterako. Hala ere, hurrengo hilabeteetan ikusiko dugu nora arte heldu ahal den iPad-a eta ondoren duzuen bideoak esaten duen moduan, hau hasiera baino ez da...

Berez nahiko bozgorailu ona dakar "tabletak", baina aurikular edo aparteko bozgorailuentzako "jack" sarrera ere badakar. Horretaz gain, moldatzaile baten bidez USB teklatu bat ere erantsi diezaiokegu.

Momentuz USAn baino ezin da erosi eta gurean asteon jarri dute erreserbatzeko aukera. Prezioari dagokionez, Amerikan 499 $-etik hasita slagai dago eta Espainian 479 €-tik hasita jarriko dute salmentan ekainetik aurrera. Datu gehiago: www.apple.com/es/ipad

"Albokak 2.1", Koteronen lan berria

2010-05-11T22:56:00.008+02:00

Ibon Koteron albokariaren proiektu berriko izenburua da "Albokak 2.1, Bizialdi Berria - Upgrade". Orain dela sei urte "Airea" diskoa kaleratu zuen eta oraingoan egitasmo zabalago eta batez ere didaktiko batekin datorkigu. Liburu eta CD formatuan kaleratu berri den lana da eta oso borobila dela ematen du. Laguntzaile moduan Xabier Valle musikari eta irakaslea aritu da.

Alde batetik diskoan, 18 kanta ezagun entzun ditzakegu eta baita hainbat grabaketa zenbait azalpen osatzeko. Horretarako hainbat musikarien laguntza izan du eta besteak beste trikitixa entzuteko abagunea ere izango dugu Ruben Isasiren eskutik. Honez gain, Asier Ercilla, Xabier Valle eta David Nanclares ere ageri dira. Aipatutako guztiak esperientzia zabala dute euskal musikaren esparruan eta seguru diskoa entzutea benetako plazerra dela.

Bestetik liburuan, albokaren bilakaera, ezaugarriak, partiturak, etab. datoz hiru hizkuntzetan.

Kanta batzuk entzuteko abiatu zaitezte MySpacen jarri duten txokora eta informazio gehiago honako webgunean topa dezakezue: sites.google.com/site/albokak21

Diskoa laster salgai jarriko dutela ematen du, baina hurrengo egunetan emango dizkizuet datu gehiago honen inguruan.

Eguneraketa: Elkarren badago salgai eta kanta batek baino gehiagok harritu egingo zaituzte. Liburuxka oso konpletua albokaren inguruko hainbat edukirekin.

Emon taldearen aurkezpen diskoa

2010-05-04T00:30:00.005+02:00

2007. urtean sortu zen talde hau Bergaran eta lehendabiziko diskoa kaleratzeko prest dute. Maiatzaren erdialdean argitaratuko da eta "Piztu Herria" izenburupean datorkigu. Emon-en estiloari dagokionez, erritmo dantzagarriak dira nagusi eta trikitixak presentzia berezia dauka Aritz Alustizaren eskutik.

Hauxe da taldeak diskoaren inguruan esaten duena:

"Lehenengo diska oso laster kaleratuko da, “Piztu herria” izenarekin. Eibarko Legarren (Ander Barriuso) grabatua izan da Angel Katarainek nahastu eta masterizatu duen diska hau. Diska heterogeneoa, 10 gai ezberdin. "Bide bazterra" abestiarekin Mexikora bidaia egin liteke eta tekila batzuk hartuta gaua alaitu. Bidaiatzea eta jamaikar doinuak gustoko ditugunez, "Iraultza-jaia" abestiarekin Toots and the Maytalsen doinuak gogora ekarri ditugu. Baina egurra ere eman beharra dago "Lerro zuzena", "Izateko" eta "Izan zu" abestiekin. Larunbat gaueko istorioak "Aurrera" abestian kontatzen dira. Bizitzan askotan nahi ez ditugun gauzak egiteko ohitura dugu, baina aurrekoari begiratu eta bere bizitza antolatzea ez dugu gustoko, "Zure bidea" abestian adierazi bezala. Cubako Guantanamo espetxeko istorio tristea ere kontatzen da, "5.eremutik" abestian. Hala ere, egun bizi dugun egoera honetan aurrera egiteko arrazoirik badela esan nahi dugu, diskaren izena daraman “Piztu herria” abestiarekin. Amaitzeko harribitxia.

Eta hau dena kolaborazio handi batzuekin."

Urrian entzun genituen Durangoko jaietan eta asko disfrutatu genuen nahiz eta euriak atsedenik eman ez. Aurrerapen kanta batzuk eta informazio gehiago honako webguneetan jaso ditzakezue:

Emon.tk / MySpace

Esne Beltzak lan berria dakar

2010-05-03T01:28:00.008+02:00

Maiatzaren erdialdean kaleratuko da Esne Beltzaren bigarren diskoa eta izenburua "Noa" izango da. Lehendabizikoa 2008an argitaratu zuten "Made in Euskal Herria" izenburuaz eta orain urte erdi Esne Zopak formazioarekin, "Esnesaltzailea" plazaratu zuten.

Azken boladan geroz eta indar gehiago hartzen ari den taldea da eta gazteen artean batez ere izugarrizko zabalkundea izan duena. Beraz, seguru udaran hamaika aldiz entzungo ditugula Xabi Solano eta konpainiak sortu dituzten pieza berri hauek...

Kaleratze data hurbildu ahala informazio gehiago izango dugu, baina bien bitartean Sarean dituzten txokoetan sartu zintezkete:

Facebook / MySpace

Eguneraketa: diskoa salgai dago jada eta Elkarren edo Baga-Bigaren webgunean eskuratu dezakezue.

Damba taldea, sustraiak uztartuz

2010-04-29T21:50:00.004+02:00

Estilo ezberdinak uztartzen dituen talde honetan, musikari askoren artean, aspalditik musika munduan dabiltzan Estanga neba-arrebek parte hartzen dute besteak beste trikitixa joz. Oskar eta Aitziber, Eztanda taldean aritu ziren urte nahikotxo Euskal Herriko hamaika plaza girotuz eta oraingoan beste taldekide askorekin batera, proposamen berri honekin datoz. Lehendabiziko diskoa 2008. urteko abenduan kaleratu zuten eta kritika oso onak jaso izan dituzte ordutik, baita kontzertu anitz eskaini gure geografian zehar eta baita gure mugetatik at ere. Hauxe da taldearen aurkezpen laburra:

"DAMBA "izaera mota bat da", "behe behetik" datorren musika, herrien sustraietatik, munduko musiketatik. Tradizioa eta modernidadea uztartuz hainbat eta hainbat estilotan jorratua, bai Rumba, Blues, Punk, Reggae bai Funk, Rock, musika Elektronikoa… "Amparanoia estiloan".

Talde hau izugarrizko ero-poztasun dosia da, dantzara eta festara gonbidatzen zaituena, "transmititzen" duten kantuz osatua. Beraien inspirazioa berriz edonork ikus-entzun ditzakeen gauzetan, maitasunaren eta bizitzaren inguruan eta munduan hainbat txokoetan dauden ideien ingurutik dator.

Testuak berriz eguneroko biziari, maitasunari, kezkei, ironiari, zintzotasunari eta poesiari buruzkoak dira.

DAMBA taldea Iparralde, Hegoalde, Kuba, Venezuela eta Madrilgo 11 musikariz osaturik dago.

Hauen musika oso aproposa da festarako, hizkuntza ezberdinetan kantatzen bait dute: euskaraz, katalanez, Brasilgo portugesez, frantsesez, ingelesez eta gazteleraz.

Lehen diskoaren izenburuan dena laburbildua dago: Y SI ROMPO MI CAMINO"

Abestiak entzuteko, argazkiak ikusteko edo informazio gehiago jasotzeko, honako bideak erabili ditzakezue:

DAMBA

Facebook / MySpace

Debagoieneko Trikitixa Egunaren berri

2010-04-21T23:39:00.007+02:00

Aurreko asteburuan ospatu zen Debagoieneko Trikitixa Eguna, blogean aurreratu genuen bezala. Eguraldia lagun izan zuten bertara hurbildu zirenek eta bideo eta argazkietan ikusi dezakegun moduan, giro ederra sortu zuten trikitizaleek. Ea hurrengo urteetan ere animatzen diren hain beharrezkoak diren elkarretaratze hauek antolatzen. Bejon deiela!

Ondorengo estekan duzue egunaren kronika, errifako zenbaki sarituak, argazkiak... eta baita ondoren ikusgai duzuen bideo muntaia hau ere.

plaentxia.com / Debagoieneko Trikitixa Eguna 2010

Iturria: plaentxia.com

Pello Ramirezen disko berria

2010-04-20T12:41:00.009+02:00

Nahiz eta ez den trikitilaria, soinu handia jotzen duelako, bere bigarren lana benetan gomendagarria da eta iruzkin bat egitea pentsatu dut.

Askotan entzun izan dut Pello gustatzen zaizkidan hainbat musikarien lanetan, Mikel Urdangarin, Benito Lertxundi edota Olatz Zugastiren diskoetan esaterako. Baina inoiz ere ez bere disko propioetan eta asko harritu nau azken honek. Elkar diskoetxearekin argitaratu du eta "Eskuz Lurrari" da bildumaren izenburua.

Abestietan akordeoia eta txeloa dira nagusi, baina beste musika tresna batzuk ere ageri dira, besteak beste: pianoa, gitarra elektrikoa eta bateria. Alabaina, kanta instrumentalak diren arren, Ordiziako Oroith abesbatzak ere parte hartu du eta esango nuke, Enyak duen kutsu melodiko hori ematen diotela kanteei. Guztira 15 pieza entzungai daude eta gehienak erdi-sinfonikoak dira, soinu banda baten antzekoak nire ustez. Hala ere, zaila da estiloa definitzea, jatorri ezberdineko elementuak uztartu dituelako Ramirezek eta horrek argi uzten du konposatzeko dohain apartekoak dituela ordiziarrak.

Musika lasaia eta indartsua era berean, amets egiteko aproposa, sentimenduz betea, intimista... hori da niri sujeritzen didana entzuterakoan. Jakin, azken disko hau bere aitaren omenez sortu duela eta uste dut, ez dagoela gorazarre ederragorik.

Diskoaren azala

Diskoaren aurkezpenean

Argazkiak: Elkar

Erromeria Eguna Itziarren

2010-04-12T14:12:00.007+02:00

Maiatzaren 1ean ospatuko da Erromeria Eguna Itziarren, baina bezperan ere bada hitzaldi interesgarri bat soinu handiak erromerian izan duen presentziaz. Bertan, Furundarena, Larrañaga, Tapia eta Mendizabal izango ditugu hizlari eta argazki erakusketa bat ikusteko aukera ere egongo da.

Zapatuan aldiz, goizean zehar kalejirak izango dira nagusi eta ohitura den legez, hamaiketakoa ere eskainiko dute. Ondoren bazkaria izango da eta azkenik bertsolari eta trikitilariekin erromeria ospatuko da. Erromeria honetan, trikitilari hauek parte hartuko dute: Jon Ostolaza eta Aitziber Estanga, Jagoba Uranga eta Amets Arteaga, Imuntzo eta Beloki eta Astiazaran anaiak. Bazkarirako txartelak erosteko azken eguna apirilaren 27a izango da eta herriko hainbat txokotan erosi ditzakezue. Azkenik, baserritarrez jantzita azaltzea gomendatzen dute antolatzaileek.

Trikitilariak publizitate kanpaina baterako

2010-04-08T23:55:00.008+02:00

Bizkaiko Trikitixa Elkartearen bitartez honako albistea dakarkizuet:

"Bizkaiko Trikitixa Elkartera Ekai publizitate agentziatik deitu dute. Eusko Jaurlaritzak plazaratu duen publizitate kanpaina bat gauzatzeko lehiaketa batera aurkeztuko dira, eta beraiek diseinatu duten kanpainako protagonista trikitilari bikote bat da (neska eta mutila). Momentuz maketa moduko bat egingo dute leihaketara aurkezteko, eta irabaziz gero, kanpaina gauzatuko lukete.

Maketa egiteko beraz, trikitilari bikotearen argazkiak behar dituzte (baserritarrez jantzita). Horretarako, hurrengo astean argazkilari batekin sesio bat egingo dute. Trikitilariak 25-30 urte ingurukoak eta alaiak izan behar dira. Zuetakoren batek parte hartzeko interesa izango balu argazki bat bidali beharko luke ondoren agertzen den helbide elektronikora. Bidalitako argazkietatik aukeraketa bat egingo lukete maketa egiteko; eta maketa irabazle suertatuz gero, agian trikitilari berdinek gauzatuko lukete kanpaina, edo beste kasting bat antolatuko lukete (hau agentziaren esku eta maketaren emaitzaren araberakoa). Zalantzarik izanez gero edo gehiago jakin nahi ezkero ere eurekin harremanetan jarri zaitezkete."

Arduradunarekin harremanetan jartzeko honako bideak erabili ditzakezue:

Asier Perez

asier@ekai.net

94 427 70 70

Iturria: Bizkaiko Trikitixa Elkartea